Davron Kabulov o‘zbek shou-biznesida nafaqat shoumen, balki ishning ko‘zini biladigan tadbirkor sifatida ham tanilgan. “Million” va “Kosmos” jamoalarining rahbari bo‘lgan Davron Kabulov tadbirkorlikda ham talaygina yutuqlarga erishgan. Xo‘sh, uning omad siri nimada, umuman, o‘zbek shou-biznesiga kirib kelish jarayonlari qanday kechgan? Serqirra ijodkorning tavallud ayyomi munosabati bilan uning hayoti va faoliyatiga nazar solamiz.
“Bozorda olcha sotardik”
Davron Kabulov Toshkent shahrida, ishchilar oilasida dunyoga kelgan. Buvisining erta o‘limi sabab uni bobosining tarbiyasiga berishgan. Boboga ermak bo‘lgan nabira bolalikdan mehnatga o‘rgangan.
— Yon qo‘shnimiz boshqa millat vakili edi. U elchixonada ishlagani uchun tomorqasiga eʼtibor berolmasdi. Bobom rahmatli o‘zimiznikiga qo‘shib qo‘shnimizning bog‘iga ham olcha daraxtini ekkandi. Har yili 13 tup olcha daraxtining mevalarini terib, bozorga olib borib sotardik. Bobom “Sharq yulduzi” jurnalini o‘qishni yaxshi ko‘rardi. Tokchalaridan gazeta, kitob va jurnallar arimasdi. Barcha bolalar singari men ham sho‘x va o‘yinqaroq bo‘lganman. Baholarim faqat aʼlo bo‘lmasa ham, ustozlarim bilan tez til topishib ketardim. Chunki tengdoshlarimga nisbatan fikrlarim ancha teran bo‘lgan. Albatta, bunda bobomning hissasi katta bo‘lgan, deydi Davron Kabulov.
“Kasallik sabab futboldan ketganman”
Davron Kabulov bolalikdan futbolchi bo‘lishni orzu qilgan. Afsuski, kasallik sabab shifokor unga futbol o‘ynashni man qilgan.
— Bolaligimdan sanʼatkor bo‘laman, deb niyat qilmaganman. Ammo esimni taniganimdan buyon futbolchi bo‘lishni orzu qilardim. Afsuski, 14 yoshimda ko‘kyo‘tal kasalligiga chalinganman. Shifokorlar bir yilga qadar futbol o‘ynashni va yugurishni taqiqlab qo‘yishgan. Afsuski, cheklov davridan so‘ng futbolni o‘ynashga bo‘lgan ishtiyoqim ancha sustlashgan. Ammo bu sport sharhlovchisi bo‘lishimga katta hissa qo‘shgan, deydi Davron Kabulov.
“Dadam katta qarzga botgan”
Ko‘pchilik Davron Kabulovni badavlat inson deb biladi. Ammo uning oilasi ham qiyin moliyaviy kunlarni boshidan o‘tkazgan.
— 1994-yil oilamiz uchun juda og‘ir kechgan. Buvim vafot etgan. Oradan ko‘p o‘tmay uyimizda yong‘in chiqib, bor-budimiz alanga ichida qolgan. O‘sha kunga qadar dadam tadbirkorlik bilan shug‘ullanar edi. Birdan ishlari orqaga ketib, 140 ming AQSH dollari miqdorda qarzga botgan. O‘sha paytda poytaxt markazi bo‘lgan “Oybek” metrosi tomondan 2-3 ming AQSH dollariga uy olsa bo‘ladigan paytlar edi. Endi qarzning qanchalik katta ekanini tasavvur qilavering. Qarzni to‘lash kerak, deb o‘zimni ko‘p narsalardan cheklardim, deydi u.
“Pul to‘lab o‘qimayman, deganman”
Davron Kabulov bilan suhbatlashgan inson uning ilmli inson ekanini darhol payqaydi. Boshqa hamkasblaridan farqli ravishda, u kitob o‘qishni yaxshi ko‘radi. Institutga ham grant asosida o‘qishga qabul qilingan.
— O‘zbekiston Milliy universitetining jurnalistika fakultetida tahsil olganman. O‘qishga kirish uchun jiddiy tayyorgarlik ko‘rganman. Oilamning moddiy ahvolini bilganim uchun “Agar kontrakt asosida o‘qishga kirsam, o‘qimayman”, deb o‘z-o‘zimga vaʼda bergandim. Shuning uchun imtihonga jiddiy tayyorgarlik ko‘rganman. Tarixdan 36 ta, ona tili va adabiyot fanidan esa 33 ta testni to‘g‘ri topganman. Ingliz tilidan ancha sust edim, 18 tagina to‘g‘ri javob topganman. U paytdagi universitetlarga kirish ballari ancha yuqori edi. “Oilamni qiyin vaziyatdan olib chiqaman”, degan qatʼiy qarorim sabab eng yuqori ballni olib, talaba bo‘lganman, deydi Davron Kabulov.
“Men Eldor Mustafoyevdan yaxshiroq sharhlayman”
Davron Kabulov tasodifan sport sharhlovchisi bo‘lgani haqida ham so‘zlab berdi.
— Aʼlochi talaba bo‘lmaganman, ammo o‘z fikrimni aytishni, bahslashishni yaxshi ko‘rardim. 86 ta talaba o‘tiradigan auditoriyada orqadagi o‘rindiqqa o‘tirib, qo‘shimchasiga ikki oyog‘imning tagiga ham alohida stullar qo‘yib qo‘yardim. Bir kuni ustozimiz sport jurnalistikasi haqida mavzu o‘tayotganda sharhlovchi Eldor Mustafoyev haqida gap ochgan. Tasodifan “Men futbolni undan yaxshiroq sharhlayman”, deb yuborganman. “Qani o‘rningdan turchi, haqiqatan futbolni yaxshi sharhlaysanmi?” degan. Ishonch bilan ha, deganimdan keyin ikki kundan keyin televideniyega kelishimni tayinlagan. Keyin bilsam, u ustoz universitetdan tashqari, O‘zbekiston Milliy teleradiokompaniyasida ham ishlar ekan. Farhod Ro‘ziyev direktorning 1-o‘rinbosari bo‘lib ishlarkan, tezda yoniga sport bo‘limi muharrirlarini chaqirib, “Bu bolaga bir tekst o‘qitib ko‘ringlar”, degan. Bolalikdan sportni kuzatganim uchun ular berayotgan savollar umuman qiyinchilik tug‘dirmagan, — deydi Davron Kabulov.
“Ishga kirolmaysan, deyishgandi”
Davron Kabulov hayotida ham hammasi oson kechmagan. U radioga ishga olinmagan kunlarini kulib eslaydi.
— Universitetda o‘qiyotgan paytimda radioboshlovchilikka qiziqib qolganman. “Poytaxt” radiosiga ishga olishmagan. “Ovozing yaxshi-ku, ammo talaffuzing xato” deyishgan. Hatto qo‘shimchasiga “Bu kamchilik bilan seni hech qayerga ishga olishmaydi”, deb yupatib ham qo‘yishgan. Sport xabarlari redaksiyasiga ishga kirganimdan keyin diktorlar o‘qigan qog‘ozlarni uyga olib kelib, har kuni kechqurun matnlarni o‘qishni mashq qilardim, deydi Kabulov.
“Efirdan chetlatib, jazolashgan”
Davron Kabulov avvaldan cho‘rtkesar bo‘lgani, jonli efirda o‘ylamay gapirib yuborganlari uchun efirdan chetlatilgani haqida gapirib berdi.
— Futbolni bor-yo‘g‘i 3-marta sharhlash baxtiga musharraf bo‘lganman. Oxirgi jonli efirda qovun tushirganimdan keyin meni 3 oyga efirdan chetlatishgan. 2006-yildan to 2012-yilga qadar televideniyeda ishladim. “Million” jamoasi tashkil etilganidan keyin bor eʼtiborimni unga qaratishga qaror qilganman. Chunki televideniyedagi “aytish mumkin emas” gaplarni aytmasligimga javob berolmasdim, deydi Davron Kabulov.
“Ayolimni 614 ta qiz ichidan tanlab olganman”
Davron Kabulov turmush qurishidan oldin 614 ta qizning nomzodini ko‘rib chiqqan. U “Muhabbat qissalari” ko‘rsatuviga bergan intervyusida turmush o‘rtog‘i uning muxlisi bo‘lgani haqida gapirgan.
— “Afruz” guruhining aʼzosi Jamshidning to‘yida bitta qiz dugonalari bilan rasmga tushsak bo‘ladimi, deb oldimga kelgan. Bizni rasmga olayotgan qizga “Sen ham tushib ol”, degan. Muxlisim bo‘lganini to‘ydan to‘rt oy o‘tib aytgan. Men sezmaganman buni, chunki uchrashgan paytlarimizda ham meni tanishiga ishonmaganman. Ayolimni 614 ta qiz ichidan tanlab olganman, deydi u.
To‘ylardagi gonorari qancha?
Davron Kabulovning Toshkentdagi to‘y-tantanalarga chiqish narxi 1000 dollar deb belgilangan. Ko‘pchilik “Million” jamoasini to‘ylarga taklif qiladi. Ammo Davron Kabulov jamoaning to‘ylarda ishtirok etishini unchalik yoqtirmaydi. Bundan tashqari, jamoaning boshqa sanʼatkorlarning konsert dasturida ishtirok etishi ham jumboqli masala. Mish-mishlarga qaraganda, “Bravo” jamoasi aʼzolarining ajralib chiqishiga ham shu masala sabab bo‘lgan. Yaʼni to‘rt aʼzo Davron Kabulovni ogohlantirmay, bir xonandaning konsert dasturida sahnaga chiqishgan. Bundan Davron Kabulov ranjigan va ularni “Million”dan chetlashtirgan.
Tadbirkorlikka qanday ulguradi?
Davron Kabulov sanʼatdan tashqari, tadbirkorlik bilan ham shug‘ullanadi. U suhbat davomida nega erkaklar kiyim do‘konini yopgani va yangi ochilgan xususiy mehmonxonasi haqida ham aytib o‘tdi.
— Ishlab chiqarishni to‘xtatganimiz yo‘q, shunchaki hozircha erkaklar kiyim do‘koni ishlamayapti, xolos. Buning asosiy sababi ishni yurita oladigan yaxshi menejerga yolchimadik. O‘zim jismonan hamma ishga ulgurmayman. Bitta menejerning qo‘li “tormoz”, boshqasi esa ishni umuman yuritolmadi. Xullas, o‘zimizni ham, brendni ham qiynagandan ko‘ra, ishni vaqtincha to‘xtatib turishga qaror qildik. Mahsulotlar ishlab chiqarilyapti va asosan onlayn savdo orqali mijozlarga yetkazib berilyapti. Uzoq yillar davomida jahon talablariga javob beradigan xususiy mehmonxona qurdim. Daromadimni unga sarflaganim uchun ham u uzoq vaqt davomida qurildi. Hozircha biznesdagi bor eʼtiborimni unga qaratyapman, deydi Davron Kabulov.
“Mehmonxona ishi bo‘yicha sudlashuv”
Davron Kabulov mehmonxona biznesi to‘liq ishga tushmay muammolarga uchragani haqida “Daryo”ga bergan intervyusida aytib o‘tgan.
— O‘tgan yili avgust oyida shaxsiy mehmonxonamiz ishga tushdi. Ikki yarim oy ishlagandan keyin Yakkasaroy gaz taʼminoti Prokuratura huzuridagi iqtisodiy jinoyatlarga qarshi kurashish departamenti bilan birga kelib, mehmonxonani nishonga olishdi. Ikki yillik davr uchun 387 million so‘m jarima qo‘llashdi. Undan keyin ham olti oyga yaqin vaqt o‘tdi, ammo hali mehmonxona buncha daromad topgani yo‘q. Menimcha, ular tadbirkorlarni shu tarzda “qo‘llab-quvvatlashyapti”.
Dadam mehmonxonaga gaz taʼminoti ulangandan keyin AQSHga ketdilar. Ammo u paytda hali mehmonxona ishga tushmagan edi. Yaʼni AQSHga ketmasdan avval sertifikat olish, GOST standartidan o‘tkazish kabi ishlarni amalga oshirib, mehmonxona ishga tushgandan keyin tuman gaz taʼminoti bilan shartnoma tuzib, gazni ulash kerak bo‘lgan. Ammo u jarayonda dadam Toshkentga bo‘lmaganlar. Ungacha bo‘lgan davrda mehmonxona ishlamaganini hamma biladi. Gaz taʼminoti esa ularga ariza topshirgan vaqtimizdan to bugungi kungacha bo‘lgan davrda quvurdan qancha gaz o‘tishi mumkin bo‘lsa, o‘shancha mablag‘ni hisoblab berishdi. Bu xuddi qishda ham yozda ham kuniga 24 soat tinimsiz gazdan foydalanilgan, degandek gap.
Eshitishim bo‘yicha, ularning shunday biznesi bor ekan. Yaʼni bir-ikki so‘mini olib, gazni chiqarib berishar ekan-da, keyin tadbirkorlardan pulini undirib olisharkan. Hozir shu ish bo‘yicha sud jarayonlari ketyapti, deydi Davron Kabulov.
Davron Kabulov yaxshi ijodkor bo‘lish bilan birga, mehribon ota bo‘lishga ham intiladi. U ikki qiz va bir o‘g‘ilning otasi. Ishdan bo‘sh vaqtlarida farzandlariga vaqt ajratishi va ular bilan o‘yingohlarga borgani haqidagi videolarni Instagram tarmog‘iga joylaydi.
Izoh (0)