BMT Bosh assambleyasi G‘azo sektoridagi harbiy harakatlarni darhol, so‘zsiz va doimiy to‘xtatishga chaqiruvchi qarorni qabul qildi. Hujjat uchun 149 ta davlat ijobiy ovoz bergan, 12 tasi qarshi chiqqan hamda 19 tasi betaraf qolgan.
AQSH, Isroil, Vengriya, Argentina, Paragvay va boshqa davlatlar qarshi ovoz berdi. Betaraflar orasida Gruziya, Hindiston, Ruminiya va Ekvador bor.
Falastin va Ispaniya boshchiligidagi 23 davlat tomonidan taklif qilingan Bosh assambleya qarori o‘t ochishni to‘xtatish, garovga olinganlarni ozod qilish va Isroil qo‘shinlarini G‘azo sektoridan to‘liq olib chiqishni talab qiladi. Shuningdek, qaror ochlikdan urush quroli sifatida foydalanishni qoralaydi va G‘azoga gumanitar yordamning to‘siqsiz kirib kelishiga ko‘maklashishni talab qiladi.
Bundan tashqari, hujjatda HAMAS va boshqa guruhlar tomonidan garovga olingan barcha mahbuslarni ozod qilish talabi ham mavjud.
Ovoz berish AQSH Xavfsizlik kengashida shunga o‘xshash tashabbusni to‘xtatganidan bir necha kun o‘tib amalga oshirildi.
Assambleya qarorlari yuridik kuchga ega bo‘lmasa-da, ular siyosiy va axloqiy ahamiyatga ega hisoblanadi.
Hujjat payshanba kuni o‘z ishini qayta boshlagan Bosh Assambleyaning 10-favqulodda sessiyasi doirasida qabul qilingan. Sessiya Isroilning bosib olingan Falastin hududidagi noqonuniy harakatlariga bag‘ishlangan. U birinchi marta 1997-yil aprel oyida chaqirilgan edi.
Oxirgi marta 10-favqulodda sessiya 2024-yil dekabr oyida chaqirilgan bo‘lib, o‘shanda ikkita qaror qabul qilingan: biri G‘azo sektorida o‘t ochishni to‘xtatishni talab qilgan, ikkinchisi esa Isroil faoliyatini taqiqlagan Falastin qochqinlariga yordam berish bo‘yicha BMTning Yaqin Sharq agentligini (UNRWA) to‘liq qo‘llab-quvvatlashni tasdiqlagan.
Umuman olganda, Bosh assambleya 1950-yildan beri 377A (V) qarori qabul qilinganidan keyin 11 ta favqulodda maxsus sessiyani chaqirgan. Bu qaror assambleyaga Xavfsizlik Kengashi o‘zining beshta doimiy a’zolari — Xitoy, Fransiya, Rossiya, Buyuk Britaniya va AQSH o‘rtasida yakdillik yo‘qligi sababli faoliyat yurita olmaydigan xalqaro tinchlik va xavfsizlik masalalarini ko‘rib chiqish vakolatini beradi.
Izoh (0)