Eron birinchi marta og‘ir, uzoq masofali, ikki bosqichli “Sejjil” raketalaridan foydalanib, Isroil nishonlariga zarba berdi. Bu haqda Islon inqilobi qo‘riqchilari korpusiga (IIQK) tayanib Tasnim xabar berdi.
Ma’lum qilinishicha, 18-iyun kuni kechasi “Haqiqiy va’da 3” operatsiyasi doirasida Isroilga qarshi javob zarbalarining 12-to‘lqini amalga oshgan. Hujum oldidan Eron isroillik muhojirlarni bosib olingan hududlardan qochishga chaqirgan. IIQK avvalgi hujumlarda yahudiy davlatining havo hujumidan mudofaa tizimlari yo‘q qilinganini ta’kidlagan.
Endilikda bosib olingan hududlar osmoni Eron raketalari va dronlari uchun ochiq. Raketa zarbalari aniq, ta’sirli va uzluksiz bo‘ladi, xuddi kecha Isroil razvedkalari shtabi, qiruvchi bazalari nishonga olingani kabi.
IIQK qo‘mondoni do‘zax eshiklari sizga ochilishi haqida ogohlantirgan edi. Havo-kosmik kuchlarning raketalari sizga yer osti boshpanalaridan tashqarida bir daqiqa ham bo‘lish imkonini bermaydi. Necha kundan beri quyosh nurini ko‘rmayapsiz, deyiladi IIQK bayonotida.
Shuningdek, bayonotda havo hujumidan trevoga sirenalarining ovozi bir lahza ham tinmasligi ta’kidlangan.
Sizlar yo boshpanalarning do‘zaxiy hayotida sekin o‘lishni tanlashingiz yoki 24 soatlik raketa zarbalaridan qutulish uchun ota-bobolaringiz bosib olgan yerlardan iloji boricha tezroq qochib ketishingiz kerak. Shundagina omon qolishingiz mumkin, deyiladi bayonotda.
Ijtimoiy tarmoqlarda Eronning uchirgan “Sejjil” raketasi aks etgan kadrlar e’lon qilindi. U havoda o‘zidan g’ayrioddiy iz qoldirganini ko‘rish mumkin.
Isroil mudofaa armiyasi 13-iyun kuni Eronga qarshi operatsiya boshladi va uning maqsadi Tehronning yadroviy dasturini yo‘q qilish deb atadi. Eron Isroil hujumiga javoban uning shaharlariga raketa va dronlar bilan zarba bera boshladi. Kamida 24 kishi halok bo‘ldi, yuzlab odamlar yaralandi. Eronda esa qurbonlar soni 270 dan oshadi.
Izoh (0)