Eronning yerosti yadroviy inshootlari shu qadar chuqur joylashganki, AQSH qurollari ularni yo‘q qila olmasligi mumkin. AQSH razvedkasining sobiq xodimi va harbiy ekspert Mettyu Shumeyker tegishli fikrni bildirdi.
Mutaxassisga ko‘ra, Amerikaning bunkerga qarshi bombalari, taxminan, 60 metr chuqurlikkacha yetib boradi. Eron obyektlari esa taxminan 90 metr chuqurlikda joylashgan.
Ehtimol, AQSH Eronning yadroviy materiallarini ham yo‘q qila olmas, deydi amerikalik ekspert.
Agar AQSH harbiylari obyektlarga zarba berishga muvaffaq bo‘lsa, u holda hududda shamol tufayli tarqalishi mumkin bo‘lgan “sezilarli kimyoviy zararlanish” xavfi paydo bo‘ladi. Prezident Donald Trampning eng yaqin maslahatchilari orasida Eronga zarba berish zarurati bo‘yicha yakdil fikr yo‘q. Siyosatchining o‘zi hujum qilish rejalarini tasdiqlagan. Biroq Tehron yadro dasturidan voz kechishi ehtimolini hisobga olib, hali yakuniy buyruq bermagan.
Isroil harbiylari Eronning eng himoyalangan yadroviy inshootlaridan biri — Fordodagi obyektni yo‘q qilish yoki vaqtincha ishdan chiqarish bo‘yicha bir nechta rejaga ega. Ammo bu rejalar AQSHning 30 ming funtli maxsus bomba tashiy oladigan strategik samolyotlari darajasida kuchli emas. Bu samolyotlar yer ostidagi obyektlarga ham zarba bera oladi.
Isroil armiyasida tog‘li hududda katta chuqurlikda joylashgan obyektga samarali zarba berish uchun zarur bo‘lgan arsenal, xususan, bunker bombalari va og‘ir bombardimonchi samolyotlar yo‘q. AQSH esa tegishli qurollarga va yaqin atrofdagi bazalardan zarba berish imkoniyatiga ega.
Tramp yaqinda Isroil bosh vaziri Binyamin Netanyaxu bilan suhbatda zarurat tug‘ilganda shunday qadam ko‘rsatishi mumkinligini istisno etmagan. Biroq hozirda AQSH bunday imkoniyatni ko‘rib chiqmayapti.
Izoh (0)