Tramp Isroil-Eron urushiga aralashishi mumkinligiga ishora qildi. Biroq yakuniy qaror qabul qilmaganini aytdi.
AQSH prezidenti Donald Tramp Qo‘shma Shtatlar 6 kun davomida shiddatli bombardimonlar uyushtirilgan Isroil-Eron o‘rtasida davom etayotgan mojaroga to‘g‘ridan to‘g‘ri aralashish yoki aralashmasligi haqida turli ma’lumotlar berishda davom etmoqda.
Respublikachilar yetakchisi bo‘lgan Trampga 18-iyun kuni Oq uyda Yaqin Sharqdagi holat yuzasidan savol berildi. Ularning orasida AQSH Eronning yadroviy inshootlariga zarba berishda Isroilga qo‘shiladimi, degan savol ham bor edi.
“Mening nima qilishimni bilmaysiz. Qo‘limdan keladi. Men bunday qilishim ham, qilmasligim ham mumkin. Nima qilmoqchiligimni hech kim bilmaydi. Men sizga shuni aytishim mumkin: Eronda ko‘p muammolar bor va ular muzokaralar olib borishni xohlamoqda”, dedi Tramp jurnalistlardan biriga.
Keyinroq “Yuventus” futbol klubi bilan oval kabinetda suratga tushayotib, Tramp yana bir bor o‘z qarorini qabul qilmaganiga ishora qilgan.
“Nima qilish kerakligi haqida g‘oyalar bor, lekin men yakuniy qarorga kelmadim. Men uzil-kesil qarorni muddatidan bir soniya oldin qabul qilishni yaxshi ko‘raman. Chunki hamma narsa o‘zgaradi, ayniqsa, urushda. Vaziyat urushda keskin o‘zgarishi mumkin”, deya qo‘shimcha qilgan Tramp.
Ba’zi respublikachilar va demokratlar Trampning Eron va Isroil o‘rtasidagi jangovar harakatlarda ishtirok etishini cheklovchi qonunchilikni joriy etgan. Shu bilan birga, konservativ sharhlovchi Taker Karlson o‘ng qanot senatori Ted Kruz bilan birgalikda videomurojaat qilgan. Unda Trampning ikki tarafdori AQSH Erondagi rejimni o‘zgartirishga intilishi kerakmi yoki yo‘qligi haqida bahslashgan.
Bunga javoban Tramp shunday dedi: “Men ham jang qilishni istamayman. Ammo agar jang qilish va ularning yadro quroliga ega bo‘lishi o‘rtasida vaziyat bo‘lsa, qilish kerak bo‘lgan ishni qilish kerak. Balki urishishga to‘g‘ri kelmas. Shuni unutmangki, biz urishayotganimiz yo‘q”.
Tramp bir necha bor ta’kidlaganidek, agar Eron AQSHning yadroviy dasturini cheklash shartlariga rozi bo‘lganida, hozirgi mojaro hech qachon sodir bo‘lmasdi. AQSH rasmiylari aprel oyidan beri eronliklar bilan uchrashib, yadroviy qurol yaratish uchun zarur bo‘lgan Eronning uranni boyitishini cheklash haqida muzokaralar olib borayotgan edi.
Ammo Eron uzoq vaqtdan beri yadroviy arsenal qurish ambitsiyalarini rad etib keladi. Buning o‘rniga uranni faqat fuqarolik energetikasi maqsadlarida ishlatishini ta’kidlagan.
Izoh (0)