Isroil va AQSH Eronning yadroviy intilishlari va Yaqin Sharqdagi “agressiv harakatlari”ga qarshi turmoqchi. Bu haqda Isroil bosh vaziri Binyamin Netanyaxu AQSH Davlat kotibi Marko Rubio bilan uchrashuvdan so‘ng ma’lum qildi.
Rubio lavozimga kirgandan beri ilk bor Isroilga tashrif buyurdi. Netanyaxuning aytishicha, u bilan bir qator masalalarni muhokama qilgan, “ularning hech biri Erondan muhimroq bo‘lmagan”.
Eron “yadro quroliga ega bo‘lmasligi kerak”
Biz oyatullohlarda yadro quroli bo‘lmasligi, Eronning mintaqadagi tajovuzkor harakatlari to‘xtatilishi kerakligi haqida kelishdik, dedi Isroil bosh vaziri.
Rubio esa Eron mintaqadagi “har bir terrorchi guruh ortida” turganini, “bu hududni o‘z uyi deb biladigan millionlab odamlar uchun tinchlik va barqarorlikka tahdid solishi”ni ta’kidladi. Netanyaxu “prezident Trampning kuchli rahbarligi ostida“ Isroil Eronga qarshi “ishni yakunlashiga” ishonch bildirdi. Shuningdek, u Trampni “Isroilning Oq uydagi eng katta do‘sti” deb atadi.
Rubio: AQSH Suriya vaziyatini diqqat bilan kuzatib boradi
AQSH davlat kotibi Suriyadagi siyosiy vaziyat haqida fikr bildirar ekan, Bashar Asad tuzumining qulashini “istiqbolli” deb baholadi, biroq shu bilan birga “bir beqarorlashtiruvchi kuchning boshqasi bilan almashtirilishi ijobiy hodisa emasligini” ta’kidlab o‘tdi.
Bu vaziyatni biz juda sinchkovlik bilan kuzatib boramiz, dedi Rubio.
O‘z navbatida, Netanyaxu “boshqa dushman kuchlarga”, avvalo Eronni nazarda tutgan holda, Suriyadan “Isroilga qarshi amaliyotlar uchun tayanch nuqtasi” sifatida foydalanishga yo‘l qo‘ymasligini aytdi. U Isroil mudofaa qo‘shinlari Suriyadagi nishonlarga “yuzlab zarbalar” berganini eslatib o‘tdi.
G‘azo sektori bo‘yicha “Qo‘shma strategiya”
Bundan tashqari, Netanyaxu G‘azo sektori bo‘yicha ikki davlatning “qo‘shma strategiyasi”ni e’lon qildi.
Biz Trampning G‘azo sektori kelajagi haqidagi dadil qarashlarini muhokama qildik va bu qarashni amalga oshirish ustida ishlaymiz, dedi u.
Avvalroq Tramp G‘azo sektorining barcha aholisini ko‘chirish va bu hududni AQSH nazoratiga olish, uni “Yaqin Sharq daryosi”ga aylantirish niyatida ekanini aytgandi.
Marko Rubio esa HAMASni yo‘q qilishga chaqirib, bu tashkilot “harbiy yoki hukumat kuchi sifatida mavjud bo‘la olmasligini” ta’kidladi.
Izoh (0)