Xalqaro atom energiyasi agentligi (MAGATE) Eronning yadro qurolini ishlab chiqarishga urinayotgani haqida aniq dalillarga ega emasligini ma’lum qildi. Bu haqda agentlik bosh direktori Rafael Grossi xabar berdi.
Grossining so‘zlariga ko‘ra, bu masalada Eron tomonidan yaratilgan noaniqlik “doimo yomon signal” hisoblanadi.
Biz siyosiy tahlilchilar yoki davlat amaldorlari emasmiz. Shuning uchun yadro quroli yaratish bo‘yicha faol dastur mavjudligini e’lon qilish uchun bizga aniq dalillar kerak, biz esa bundaylarni ko‘rmadik, dedi Grossi.
Uning ta’kidlashicha, hech bir davlat Eron kabi uranni 60 foizgacha boyitmayapti. Bu esa texnik jihatdan yadro quroli ishlab chiqarish uchun zarur bo‘lgan darajaga (90 foizga) yaqin. MAGATE rahbari Eronning ko‘plab yuqori lavozimli amaldorlari u bilan suhbatlarda yadro quroli yaratish islomga zid ekanini tan olganini aytdi. Biroq Eron bu qurolni yaratish uchun zarur bo‘lgan “pazl bo‘laklari”ning barchasiga ega.
Isroilning da’vosiga ko‘ra, Eron nafaqat yadro bombalarini yaratish, balki ularni portlatish uchun zarur bo‘lgan texnik tadqiqotlar olib borishga kirishgan. Tel Aviv may oyida razvedka ma’lumotlariga tayanib bu haqda AQSHni ogohlantirgan.
Ammo isroilliklar ushbu ma’lumotlarni yetkazganiga qaramay, amerikalik rasmiylar — jumladan, yuqori martabali razvedkachi, yana bir AQSH rasmiysi va ikki nafar kongress vakili yordamchisi — Tehronning bomba yasashga qat’iy qaror qilganiga ishongani yo‘q.
Izoh (0)