AQSH razvedkasi Eronning yadroviy qurol yaratish ustida ishlayotganiga doir dalillarni topmadi. Bu haqda Senatning razvedka bo‘yicha maxsus qo‘mitasi rais o‘rinbosari Mark Uorner xabar berdi.
Senatorning eslatishicha, mart oyida AQSH Milliy razvedka direktori Tulsi Gabbard “Eron bomba yaratish bo‘yicha hech qanday harakat qilmagani” haqida bayonot bergan.
Shu haftaning dushanba kunida razvedka ma’lumotlari o‘zgarmaganini tasdiqlovchi xabar oldik. Tvitlar orqali tashqi siyosat yuritish — aqlsizlik. Lekin bu odam aynan shunday qilyapti, deya senator prezident Trampga ishora qildi.
U hozirda AQSHning mazkur vaziyat bo‘yicha siyosati qanday ekanidan mutlaqo bexabar ekanini ta’kidladi.
Men Razvedka qo‘mitasi raisi o‘rinbosariman, agar menda hech qanday tasavvur bo‘lmasa, Amerika xalqi nimalarni biladi?, dedi Mark Uorner.
Trampni uning qarashlariga teskari fikrlar tashvishlantirmaydi
AQSH prezidenti Donald Tramp jurnalistlar savollariga javob berar ekan, Eron yadro qurolini qo‘lga kiritishiga “bir necha hafta” qolganini aytdi. Mazkur prognoz razvedka ma’lumotlariga zid keladi. AQSHning yana bir urushga aralashishi ehtimoli haqidagi savolga javob berar ekan, Tramp o‘zining avvalgi fikrini ham takrorladi:
Men ham aralashishni istamayman, lekin men 20 yildan beri, balki undan ham ko‘proq vaqtdan buyon Eronda yadro quroli bo‘lmasligi kerakligini aytib kelaman, dedi u.
ABC telekanali va The Wall Street Journal gazetasi manbalariga ko‘ra, AQSH prezidenti unga taqdim etilgan Eronga zarba berish rejalarini ma’qullagan, biroq Tehron bilan yadro dasturini to‘xtatish bo‘yicha muzokaralar uchun yakuniy buyruq bermagan. O‘z navbatida, Eron hukumati yadro qurolini qo‘lga kiritish niyati haqidagi ayblovlarni rad etishni davom ettirmoqda.
MAGATE ham Eron yadroviy qurol yaratishga urinmaganini ta’kidladi
Xalqaro atom energiyasi agentligi (MAGATE) o‘z ma’lumotlariga asoslanib, Eron yadro qurolini ishlab chiqishga urinmagan, deb hisoblaydi. Bu haqda agentlik bosh direktori Rafael Grossi ma’lum qildi.
Uning ta’kidlashicha, hech bir davlat Eron kabi uranni 60 foizgacha boyitmayapti. Bu esa texnik jihatdan yadro quroli ishlab chiqarish uchun zarur bo‘lgan darajaga (90 foizga) yaqin. MAGATE rahbari Eronning ko‘plab yuqori lavozimli amaldorlari u bilan suhbatlarda yadro quroli yaratish islomga zid ekanini tan olganini aytdi. Biroq Eron bu qurolni yaratish uchun zarur bo‘lgan “pazl bo‘laklari”ning barchasiga ega.
Izoh (0)