AQSH fuqarolarining yarmidan ko‘pi Vashingtonning Eron va Isroil o‘rtasidagi mojaroda ishtirok etmasligi kerakligini ta’kidlamoqda. Bu YouGov so‘rovnomasi natijalaridan ma’lum bo‘ldi.
So‘rovnoma 13-16-iyun kunlari o‘tkazilgan. Unda 1,5 mingga yaqin kishi ishtirok etgan. Respondentlarning 60 foizi AQSHning ushbu mojaroga aralashishiga qarshi chiqqan, 16 foizi esa bunga ijobiy qarashini bildirgan. Qolgan 24 foiz o‘z nuqtayi nazarini aniqlay olmaganini ma’lum qilgan.
So‘rovda ishtirok etganlarning ko‘pchiligi (56 foizi) AQSH Eron bilan yadro dasturi bo‘yicha muzokaralarda qatnashishi lozim deb hisoblaydi.
Tadqiqot natijalariga ko‘ra, amerikaliklarning taxminan 50 foizi Eronni “AQSHning dushmani” sifatida baholaydi.
So‘rovnoma shuni ko‘rsatdiki, amerikaliklar orasida 36 foizi Isroilni AQSHning ittifoqchisi deb biladi, 10 foizi Isroilga do‘stona munosabatda emasligini aytgan, 6 foizi esa uni dushman deb atagan. Qolgan ishtirokchilar esa javob berishga qiynalgan.
Ilgari ba’zi G‘arb OAVlari manbalarga tayanib, AQSH prezidenti Donald Tramp AQSHning Isroilning Eron yadro obyektlariga zarba berishida ishtirok etish imkoniyatini ko‘rib chiqayotgani haqida xabar bergan edi.
Bundan oldin Tramp Truth Social ijtimoiy tarmog‘ida Tehron haqida bir qator keskin bayonotlar bergan edi. Xususan, u Eronga yadro qurolini qo‘lga kiritishiga yo‘l qo‘ymasligini aytib, mamlakat hukumatidan “so‘zsiz taslim bo‘lishni” talab qilgan.
Izoh (0)