Eron tashqi ishlar vaziri Abbos Arag‘chi Isroil bilan harbiy harakatlar boshlanganidan keyin AQSHning Yaqin Sharqdagi maxsus elchisi Stiv Uitkoff bilan bir necha marta telefon orqali gaplashgan. Bu haqda Reuters agentligi bir nechta nomi oshkor etilmagan diplomatlarga tayanib ma’lum qilgan.
Ularning aytishicha, birinchi telefon qo‘ng‘irog‘i Vashington tashabbusi bilan amalga oshirilgan. Unda AQSH maxsus elchisi Yaqin Sharqdagi mojaroni hal etish bo‘yicha yangi taklif bildirgan. Bundan tashqari, Arag‘chi va Uitkoff janoblari AQSHning may oyi oxirida Eronga bergan taklifini muhokama qilishgan. Bu taklif Erondan tashqarida uranni boyitish bo‘yicha mintaqaviy konsorsium tuzishni nazarda tutadi. Tehron hozirgacha bu taklifni rad etib kelayotgan edi.
Agentlik manbalarining ta’kidlashicha, so‘nggi muzokaralar shu hafta o‘tkazilgan. Ularning so‘zlariga ko‘ra, bu suhbat aprel oyida ikki mamlakat o‘rtasidagi muzokaralar boshlanganidan beri eng mazmunli bo‘lgan. Arag‘chi AQSH maxsus elchisiga, agar AQSH Isroilga hujumlarni to‘xtatish uchun bosim o‘tkazsa, Eron “yadro masalasida moslashuvchanlik ko‘rsatishi mumkinligini” aytgan. Shuningdek, aks holda Tehron muzokaralarga qaytmasligini qo‘shimcha qilgan.
Ta’kidlash joizki, Eron AQSH bilan islom respublikasining yadro dasturi bo‘yicha besh bosqichli muzokaralar o‘tkazgan. Tomonlarning 15-iyunga rejalashtirilgan uchrashuvi bekor qilingan, chunki bundan ikki kun oldin Isroil Eronning yadroviy va mudofaa sanoati obyektlariga qarshi “Isyonkor sher” operatsiyasini boshlagan edi. Shundan so‘ng Eron va Isroil o‘rtasida o‘zaro hujumlar boshlangan.
Izoh (0)