Butun dunyoda MI6 nomi bilan tanilgan Britaniya tashqi razvedka xizmatiga ilk bor ayol rahbar — 47 yoshli Bleyz Metreveli tayinlanmoqda. Bu haqda BBC xabar berdi.
U kuzda amaldagi razvedka rahbari Richard Mur o‘rnini egallaydi. Metreveli 1999-yilda Kembrij universitetida tahsil olayotgan paytda razvedka xizmatiga ishga kirgan. Faoliyatining katta qismini Yaqin Sharq va Yevropada o‘tkazgan.
Hozirda u MI6 da texnologiyalar va innovatsiyalar bo‘limiga rahbarlik qilmoqda. Bu lavozim jamoatchilikda “Q” nomi bilan tanilgan rahbariyat doirasiga kiradi. Bungacha u Britaniyaning ichki xavfsizlik xizmati — MI5 da turli rahbarlik lavozimlarida faoliyat yuritgan.
MI6 xorijda ma’lumot to‘plash, dushman davlatlarga qarshi kurash va terrorizmga qarshi choralarni muvofiqlashtirish bilan shug‘ullanadi. 2021-yilda “direktor K” taxallusi ostida The Telegraph gazetasiga bergan intervyusida Metreveli Britaniyaga tahdid Rossiyaning o‘zi emas, balki uning siyosati ekanini ta’kidlagandi. Shuningdek, u Xitoy dunyoni o‘zgartirayotgani bois bu Britaniya uchun katta imkoniyat ham, xavf ham ekanini qayd etgan.
Buyuk Britaniya bosh vaziri Kir Starmer Metrevelining tayinlanishini tarixiy hodisa deb atab, ayni paytda razvedka xizmati faoliyati har qachongidan ham muhimroq ekanini ta’kidlagan. MI6 ni so‘nggi besh yil davomida boshqargan Richard Mur ham bu tayinlovni tarixiy deb baholadi.
Bleyz — yuqori malakali razvedkachi va yetakchi. U texnologiyalar sohasida eng ilg‘or aql egalaridan biridir, degan u.
Izoh (0)