AQSH prezidenti Donald Tramp Isroilning Eronga qarshi harbiy operatsiyasiga qo‘shilishga qaror qilgan taqdirda, Italiya AQSHga o‘z hududidagi harbiy bazalarni taqdim etishi mumkin. La Repubblica gazetasi Italiya hukumatidagi manbalarga tayanib xabar berishicha, hozircha hamkorlardan bunday iltimos tushmagani aytilmoqda.
Ma’lum qilinishicha, Rim ehtiyotkorlik va mulohazokorlik bilan ish tutmoqda, chunki Iroq va Livanda joylashgan Italiya kontingenti xavf ostida qolishi mumkin. Bu Eronning Isroilni qo‘llab-quvvatlovchi davlatlarning bazalariga zarba berish to‘g‘risidagi ogohlantirishi fonida yuz berishi mumkin.
Ta’kidlanishicha yakuniy qaror Rimga tegishli bo‘lsa-da, Italiya hukumati Vashingtonning talabini rad eta olmaydi. Bu holda gap NATOning Aviano, Vichensa, Neapol va Sitsiliya orolidagi Sigonella bazalari haqida bormoqda.
Kanadada bo‘lib o‘tgan “Katta yettilik” sammiti yakunlari bo‘yicha matbuot anjumanida Italiya bosh vaziri Jorja Meloni bazalardan foydalanish imkoniyati haqidagi savolga to‘g‘ridan-to‘g‘ri javob berishdan o‘zini olib qochgan.
“Vaqti kelganda vaziyatga baho beramiz. Bunday qarorlar shoshilinch qabul qilinmaydi”, degan Jorja Meloni.
Nashrining yozishicha, har qanday holatda ham Rim AQSH birinchi navbatda Saudiya Arabistoni, Misr va Bahrayndagi mintaqaviy bazalardan foydalanishiga umid qilmoqda.
AQSH prezidenti Donald Tramp Eronga hujum qilish rejasini maxfiy ravishda ma’qulladi, biroq Tehron yadro dasturidan voz kechishi ehtimolini hisobga olib, zarba berish to‘g‘risidagi yakuniy buyruqni hali bermagani xabar qilingandi.
Isroil 13-iyunga o‘tar kechasi Eronning yadro dasturiga qarshi “Isyonkor sher" operatsiyasini boshladi. Bir sutkadan kam vaqt o‘tgach, Islom Respublikasi javob hujumini amalga oshirdi. Keyingi kunlarda Isroil va Eron o‘zaro zarba berishni davom ettirdi. Ikkala tomon ham ushbu hujumlar natijasida halok bo‘lganlar va jabrlanganlar borligini ma’lum qildi, o‘z hududlaridagi bir qator obyektlarga zarba yetkazilganini tan oldi, ammo yetkazilgan zarar cheklangan ekanini ta’kidladi.
Izoh (0)