Hozirda G7 ga raislik qilayotgan Italiya Isroilga hujum qilgan Eronga qarshi yangi sanksiyalar joriy etishga tayyor. Bu haqda Italiya tashqi ishlar vaziri Antonio Tajani Reuters agentligiga bergan intervyusida ma’lum qildi.
TIV rahbarining so‘zlariga ko‘ra, yangi sanksiyalar Buyuk Britaniya, Italiya, Kanada, Germaniya, AQSH, Fransiya va Yaponiyani o‘z ichiga olgan butun G7 ning qo‘llab-quvvatlashini talab qiladi. Shuningdek, u har qanday yangi choralar mamlakatlarga emas, balki shaxslarga qaratilgan bo‘lishi kerakligini taklif qildi.
Agar biz Isroilga aniq qarshilik ko‘rsatadigan, masalan, terrorizmni, HAMASni qo‘llab-quvvatlagan shaxslarga nisbatan ko‘proq sanksiyalar qo‘llashimiz zarur bo‘lsa, buni amalga oshiramiz, lekin biz juda jiddiy bo‘lishimiz va birgalikda harakat qilishimiz kerak, dedi Tajani.
Vazir Eron hujumini Tehron uchun “katta xato”, biroq Isroil uchun “ijobiy” deb atadi, chunki, uning fikricha, bu hujum ko‘plab dronlar va raketalarni urib tushirgan Isroil havo mudofaasining samaradorligini ko‘rsatdi.
Avvalroq 13-apreldan 14-aprelga o‘tar kechasi sodir bo‘lgan Eronning Isroilga qarshi hujumi munosabati bilan Italiyada dushanba kuni bir qator favqulodda yig‘ilishlar o‘tkazilishi rejalashtirilgani xabar qilingandi.
Izoh (0)