Isroil Eronga qarshi “bir nechta syurprizlar”dan iborat yangi operatsiya tayyorladi. Bu haqda Isroilning AQSHdagi elchisi Yexiel Leyter ma’lum qildi.
Elchining so‘zlariga ko‘ra, mazkur operatsiya Isroil 2024-yil Livandagi “Hibzulloh” a’zolarining peyjerlarini ommaviy portlatganidan ham kuchliroq bo‘ladi.
Biz bir nechta syurpriz tayyorladik. Payshanba, juma kunlari vaziyat tinchiganida bir nechta syurprizlarni ko‘rasiz, ular fonida peyjer operatsiyasi deyarli oddiy bo‘lib ko‘rinadi, dedi Isroilning AQSHdagi elchisi Yexiel Leyter.
O‘z navbatida, Eron yaqin soatlarda Isroilga kuchliroq zarba berishga tayyorlanmoqda. Bunda yangi zamonaviy va yuqori aniqlikdagi qurollarni qo‘llash rejalashtirilgan. Bu haqda Eron armiyasining quruqlikdagi qo‘shinlari qo‘mondoni Amir Haydariy ma’lum qildi.
Qurolli kuchlar, ayniqsa, armiyaning quruqlikdagi kuchlari tomonidan yangi va ilg‘or qurollar bilan shiddatli hujumlarning yangi to‘lqini boshlandi va yaqin soatlarda kuchayadi, dedi u.
Ma’lumot o‘rnida, 2024-yil 17-sentyabr kuni Livanda “Hizbulloh” a’zolari foydalangan yuzlab peyjerlar portladi. Ertasi kuni butun mamlakat bo‘ylab boshqa elektron qurilmalar, jumladan, noutbuklar va ratsiyalar portlay boshladi. 30 dan ortiq kishi halok bo‘ldi, minglab odamlar jarohatlandi. Isroil razvedkasi qurilmalarni “Hizbulloh”ga yetkazib berilishidan oldin qo‘lga kiritgan. Ularning batareyalariga portlovchi moddalar o‘rnatgan va keyin ularning haroratini masofadan boshqarib oshirgan.
Isroil va Eronning o‘zaro hujumlari 13-iyunga o‘tar kechasi boshlandi. Yahudiy davlati “Isyonkor sher” operatsiyasini olib bormoqda. Uning doirasida Isroil qo‘shinlari Eron hududidagi yadroviy va harbiy obyektlarga hujum qilmoqda.
Eron oliy rahnamosi fuqarolarga yo‘llagan murojaatida Isroilning Eronga bergan zarbalarini jinoyat deb atagan. U Isroilni “achchiq va dahshatli taqdir” kutayotganini ta’kidlagan. Tehron “Haqiqiy va’da 3” nomli operatsiyani boshlagan. Uning doirasida Isroilga yuzlab raketalar uchirilgan. Ikki davlat bir-biriga hujum qilishda davom etmoqda.
Izoh (0)