Isroil bosh vaziri Binyamin Netanyaxu Vashingtonni Tehron bilan mojaroga tortishga urinmoqda, biroq AQSH prezidenti Donald Tramp ma’muriyati bu masalada hali qaror qabul qilmagan. Bu haqda Avstriyaning sobiq tashqi ishlar vaziri Karin Knaysl ma’lum qildi.
Uning ta’kidlashicha, AQSH uchun qizil chiziq Amerika harbiy bazasiga hujum bo‘lishi mumkin.
“Hozircha Tramp haqiqatan ham urushga qo‘shiladimi yo‘qmi, bilmaymiz. Bilishimcha, u hali bu haqda bayonot bermagan. Tushunishimcha, AQSH uchun qizil chiziq Amerika harbiy bazasiga hujum bo‘ladi. Lekin hozircha bunday voqea sodir bo‘lgani yo‘q. Men bu haqda yaxshi xabardorman”, dedi Knaysl.
Knayslning aytishicha, Netanyaxu so‘nggi besh-olti kun ichida o‘z mamlakatini “keskin qarama-qarshilikka” tortmoqda.
“Men boshidanoq gap faqat Eronning yadro dasturi haqida emas, balki rejim o‘zgarishi haqida ketayotganini aytgan edim. Umid qilamanki, AQSH hukumati bu urushga qo‘shilmaydi, chunki bu Netanyaxuning taktikasi edi. Bu strategiya emas, bu Qo‘shma Shtatlarni ushbu urushga jalb qilish taktikasi edi”, deydi sobiq diplomat.
Bundan avval ABC News telekanali Vashingtonning Isroilning Eronga qarshi harbiy operatsiyasiga qo‘shilishi to‘g‘risidagi qaror yaqin 24-48 soat ichida qabul qilinishi mumkinligini xabar qilgan edi. Isroil televideniyesining 12-kanaliga ko‘ra, yahudiy davlati rasmiy shaxslari ham AQSH Isroil operatsiyasida ishtirok etishga yaqin, deb hisoblashmoqda.
Vermont shtati senatori Berni Sanders Isroil bosh vaziri Binyamin Netanyaxuni AQSH va Eron o‘rtasidagi yadroviy kelishuv bo‘yicha muzokaralarni barbod qilganlikda ayblagandi.
Isroil 13-iyunga o‘tar kechasi Eronning yadro dasturiga qarshi “Isyonkor sher" operatsiyasini boshladi. Bir sutkadan kam vaqt o‘tgach, Islom Respublikasi javob hujumini amalga oshirdi. Keyingi kunlarda Isroil va Eron o‘zaro zarba berishni davom ettirdi. Ikkala tomon ham ushbu hujumlar natijasida halok bo‘lganlar va jabrlanganlar borligini ma’lum qildi, o‘z hududlaridagi bir qator obyektlarga zarba yetkazilganini tan oldi, ammo yetkazilgan zarar cheklangan ekanini ta’kidladi.
Izoh (0)