Isroilning Eron ballistik raketalari zarbalaridan himoyalanish uchun foydalanayotgan Arrow mudofaa raketalari tugamoqda. Bu haqda amerikalik amaldor The Wall Street Journal nashriga xabar berdi.
Amaldorga ko‘ra, bu Isroilning Eronga qarshi uzoq muddatli urush olib borish qobiliyatini shubha ostiga qo‘yadi. Mashhur “Temir gumbaz” havo hujumidan mudofaa tizimi hozirgi mojaroda kam qo‘llanilmoqda, chunki u qisqa masofali raketalarni qaytarishga mo‘ljallangan.
Isroilning asosiy qalqoni 2400 kilometrgacha bo‘lgan Arrow 3 raketalari bo‘lib, ular yahudiy davlatiga uchayotgan raketalarni uning chegaralaridan uzoqda urib tushirishga qodir. Shuningdek, yaqinroq tahdidlarni bartaraf etish uchun 70 kilometrgacha masofani qamrab oluvchi Arrow 2 tizimi ham qo‘llaniladi.
WSJ manbasi ta’kidlashicha, AQSH bir necha oydan beri Isroilning mudofaa salohiyati yetarli emasligini anglab yetgan. Shu sababli iyun oyida turli turdagi raketaga qarshi tizimlarni yetkazib berishni ko‘paytirgan, ammo ularning zaxiralari ham cheksiz emas. O‘tgan yillar davomida Pentagon ishlab chiqaruvchilardan atigi 605 ta mudofaa raketalarini sotib olgan.
Isroil rasmiylariga ko‘ra, ular dushman ballistik raketalarining qariyb 90 foizini urib tushiradi. Eron tomonidan uchirilgan 370 ta raketadan atigi 30 ga yaqini (17-iyun holatiga ko‘ra) nishonga yetib borgani aytilmoqda.
Ammo Strategik va xalqaro tadqiqotlar markazining (CSIS) raketaga qarshi mudofaa loyihasi direktori Tom Karakoning so‘zlariga ko‘ra, samaradorlik emas, balki salohiyat muhimroqdir.
AQSH ham, Isroil ham kun bo‘yi uchirilgan raketalarni to‘xtovsiz bartaraf etishda davom eta olmaydi. Isroilliklar va ularning ittifoqchilari imkon qadar tezroq zarur choralarni ko‘rishi lozim. Ular shunchaki o‘tirib, mudofaa o‘yinini o‘ynashga yo‘l qo‘ymasligi kerak, deydi Tom Karako.
Arrow tizimlarini ishlab chiqaruvchi Israel Aerospace Industries kompaniyasi yuqoridagi xabarga izoh bermagan. Isroil mudofaa kuchlari bayonotida shunday deyilgan: “SAHAL tayyor va har qanday ssenariyni yengishga tayyor. Afsuski, biz o‘q-dorilar bilan bog‘liq masalalarga izoh bera olmaymiz”.
Izoh (0)