Time jurnali 2021-yil bo‘yicha dunyoning eng nufuzli kishilari reytingini e’lon qildi. Undan hozir koloniyada jazo o‘tayotgan rossiyalik muxolifat yetakchisi Aleksey Navalniy ham joy olgan.
Reyting oltita toifaga bo‘lindi – “Kumirlar”, “Peshqadamlar”, “Gigantlar”, “San’at ustalari”, “Yetakchilar” va “Ixtirochilar”, ularning har biriga 11 dan 20 nafargacha kishi kiritildi.
Navalniy “Kumirlar” toifasidan joy oldi, unga, shuningdek, Britaniya shahzodasi Garri va uning rafiqasi Megan Markl, tennischi Naomi Osaka, qo‘shiqchi Britni Spirs va yaponiyalik beysbolchi Syoxey Otani ham kiritilgan.
Aleksey Navalniy “Novichok” moddasidan zaharlanib, Berlinda davolanib qaytgach, 17-yanvar kuni Moskvaning Sheremetyevo aeroportida hibsga olingandi. Fevral oyida Navalniyga “Iv Roshe” ishi bo‘yicha tayinlangan shartli jazo haqiqiy hukm bilan almashtirildi. Muxolifatchi 2023-yilning avgustida koloniyadan ozod qilinishi kerak. Shu bilan birga, hozir Navalniy yana uchta jinoiy ishda qatnashmoqda.
2017-yilning yozida Time nashri Navalniyni internetdagi eng nufuzli kishilar qatoriga kiritgan. O‘shanda jurnal Navalniyning ro‘yxatga kiritilishini “uning 1 million obunachiga ega YouTube-kanali Kreml axborot blokadasini buzgani”, shuningdek, “korrupsiyaga qarshi ommaviy norozilik namoyishlari qo‘zg‘atgani” bilan izohlagan.
“Gigantlar” orasida Apple bosh direktori Tim Kuk, AQSh gimnastikasi bo‘yicha to‘rt karra Olimpiya chempioni Simone Baylz, Milliy futbol ligasi yulduzi Tom Bredi, raperlar Timbaland va Swizz Beats, AQShning eng ko‘p unvonga ega yengil atletikachisi Ellison Feliks bor.
“San’at ustalari” toifasiga aktrisalar Keyt Uinslet va Skarlett Yoxansson, reperlar Lil Nas X va Bad Bunny, aktyorlar Omar Si, Daniel Kaluya, shuningdek, eng yaxshi rejissor nominatsiyasi bo‘yicha “Oskar” mukofotiga sazovor bo‘lgan birinchi osiyolik ayol Xloya Chjao kiritilgan.
Bu yilgi “Yetakchilar” safidan Jahon savdo tashkiloti (JST) rahbari Ngozi Okonjo-Iveala, Eron prezidenti Ibrohim Raisiy, Italiya va Isroil bosh vazirlari Mario Dragi va Naftali Bennet, AQSh Kasalliklarni nazorat qilish va oldini olish markazi rahbari Roshel Valenski, Salvador prezidenti Nayib Bukele va Afg‘oniston bosh vaziri o‘rinbosari vazifasini bajaruvchi Mulla Abdulg‘ani Barodar singari kishilar joy oldi. Shuningdek, ketma-ket ikkinchi yil ushbu toifadagi ro‘yxatga Xitoy Xalq Respublikasi raisi Si Szinpin, AQSh prezidenti Jo Bayden, AQSh sobiq prezidenti Donald Tramp, Hindiston bosh vaziri Narendra Modi va AQSh vitse-prezidenti Kamala Xarris kiritildi.
“Ixtirochilar” toifasiga SpaceX asoschisi Ilon Mask, Nvidia bosh direktori Jensen Xuang, General Motors bosh direktori Meri Barra va kanadalik dasturchi Vitalik Buterin kiritildi.
Izoh (0)