AQSH davlat departamenti elchixonalar va konsulliklarga may oyi oxirida to‘xtatilgan talabalar viza uchrashuvlarini qayta tiklash mumkinligini ma’lum qildi. Bu haqda CNN xabar berdi.
Endilikda elchixonalar talaba vizasi uchun ariza beruvchilarni “AQSH fuqarolariga, madaniyat, hukumat va muassasalariga dushmanlik munosabati bor yoki yo‘qligini” tekshirib ko‘radi.
Yangi nizomga ko‘ra, tekshiruv talaba vizasi talabgorlarining ijtimoiy tarmoqlardagi “onlayn mavjudligi”ni baholaydi. Ariza beruvchilardan ijtimoiy tarmoqlardagi profillarini jamoatchilikka ochiq qilib qo‘yish so‘raladi. Aytilishicha, “onlayn mavjudlikning cheklangani yoki ko‘rinishi ma’lum bir faoliyatdan qochish yoki yashirishga urinish sifatida talqin qilinishi mumkin”.
Tramp ma’muriyati so‘nggi oylarda xalqaro talabalarni AQSHga kelishdan qaytaradigan harakatlarni amalga oshirayotgandi. U “agressiv ravishda” talabalar vizalarini bekor qilgan va aynan Garvard universitetini nishonga olgandi.
Talabalik va ayirboshlash vizalari rasmiy ravishda F, M va J vizalari deb nomlanadi. Ushbu nizom yangi va qaytib kelayotgan studentlarga taalluqli bo‘ladi. Unda “abituriyentning nafaqat ijtimoiy tarmoqlardagi faoliyati, balki barcha onlayn mavjudligini har qanday tegishli qidiruv tizimlari yoki boshqa onlayn resurslardan foydalangan holda ko‘rib chiqish”, shu jumladan, “konsullik bo‘limi kirish huquqiga ega bo‘lgan har qanday ma’lumotlar bazasini tekshirish” talab etiladi.
Matbuot tomonidan nizomda “fuqarolarga, madaniyatga, hukumatga yoki institutlarga dushmanona munosabat” nima ekanligi haqida batafsil ma’lumot berilmagan. Ta’kidlanishicha, elchixonalar va konsulliklar 5 ish kuni ichida yangi nizomni amaliyotda qo‘llashi lozim.
Izoh (0)