Rossiya Ukrainadagi urushni “imkon qadar tezroq”, afzalrog‘i, tinch yo‘l bilan tugatmoqchi va muzokaralarni davom ettirishga tayyorligini ma’lum qildi. Bu haqda “RIA Novosti” xabar berdi.
18-iyunda yirik xalqaro axborot agentliklari bosh muharrirlari bilan bo‘lib o‘tgan davra suhbatida Putin prezident Vladimir Zelenskiy bilan uchrashishga tayyorligini bildirgan.
“Rossiya muzokaralarda Ukraina nomidan kim ishtirok etayotgani bilan qiziqmaydi, lekin har qanday yakuniy kelishuv qonuniy hokimiyat imzosiga ega bo‘lishi kerak”, dedi Putin.
Kreml uzoq vaqtdan beri Kiyevni obro‘sizlantirish uchun Zelenskiyni “noqonuniy” deb ko‘rsatishga harakat qilmoqda. Rossiya prezidenti matbuot kotibi Dmitriy Peskov 18-fevral kuni Rossiyani 20 yildan ortiq boshqargan Putin Zelenskiy bilan muzokaralarga tayyorligini, biroq “uning qonuniyligi bilan bog‘liq huquqiy jihatlar”ni ko‘rib chiqish kerakligini aytgandi.
Ukraina Rossiyaning keng ko‘lamli bosqini davrida saylov o‘tkaza olmagan. Chunki bunday saylov o‘tkazish 2022-yil 24-fevral oyida qonunan taqiqlangandi. Ukraina qonunchiligi, shuningdek, saylovlar xavfsiz, teng va uzluksiz bo‘lishi kerakligini talab qiladi — bu Rossiyaning tinch aholiga va muhim infratuzilmaga davom etayotgan hujumlari sharoitida bajarib bo‘lmaydigan holat hisoblanadi.
Putin, shuningdek, 14-iyun kuni AQSH prezidenti Donald Trampga Moskva 22-iyundan keyin asirlar va halok bo‘lgan askarlarni almashish yakunlangandan so‘ng Kiyev bilan tinchlik muzokaralarining yangi raundini o‘tkazishga tayyorligini bildirgandi.
Izoh (0)