АҚШ президенти Дональд Трамп Исроилнинг Эронга қарши ҳарбий операциясига қўшилишга қарор қилган тақдирда, Италия АҚШга ўз ҳудудидаги ҳарбий базаларни тақдим этиши мумкин. Ла Репубблиcа газетаси Италия ҳукуматидаги манбаларга таяниб хабар беришича, ҳозирча ҳамкорлардан бундай илтимос тушмагани айтилмоқда.
Маълум қилинишича, Рим эҳтиёткорлик ва мулоҳазокорлик билан иш тутмоқда, чунки Ироқ ва Ливанда жойлашган Италия контингенти хавф остида қолиши мумкин. Бу Эроннинг Исроилни қўллаб-қувватловчи давлатларнинг базаларига зарба бериш тўғрисидаги огоҳлантириши фонида юз бериши мумкин.
Таъкидланишича якуний қарор Римга тегишли бўлса-да, Италия ҳукумати Вашингтоннинг талабини рад эта олмайди. Бу ҳолда гап НАТОнинг Авиано, Виченса, Неапол ва Сицилия оролидаги Сигонелла базалари ҳақида бормоқда.
Канадада бўлиб ўтган “Катта еттилик” саммити якунлари бўйича матбуот анжуманида Италия бош вазири Жоржа Мелони базалардан фойдаланиш имконияти ҳақидаги саволга тўғридан-тўғри жавоб беришдан ўзини олиб қочган.
“Вақти келганда вазиятга баҳо берамиз. Бундай қарорлар шошилинч қабул қилинмайди”, деган Жоржа Мелони.
Нашрининг ёзишича, ҳар қандай ҳолатда ҳам Рим АҚШ биринчи навбатда Саудия Арабистони, Миср ва Баҳрайндаги минтақавий базалардан фойдаланишига умид қилмоқда.
АҚШ президенти Дональд Трамп Эронга ҳужум қилиш режасини махфий равишда маъқуллади, бироқ Теҳрон ядро дастуридан воз кечиши эҳтимолини ҳисобга олиб, зарба бериш тўғрисидаги якуний буйруқни ҳали бермагани хабар қилинганди.
Исроил 13 июнга ўтар кечаси Эроннинг ядро дастурига қарши “Исёнкор шер" операциясини бошлади. Бир суткадан кам вақт ўтгач, Ислом Республикаси жавоб ҳужумини амалга оширди. Кейинги кунларда Исроил ва Эрон ўзаро зарба беришни давом эттирди. Иккала томон ҳам ушбу ҳужумлар натижасида ҳалок бўлганлар ва жабрланганлар борлигини маълум қилди, ўз ҳудудларидаги бир қатор объектларга зарба етказилганини тан олди, аммо етказилган зарар чекланган эканини таъкидлади.
Изоҳ (0)