Meksikaning Tinch okeani qirg‘oqlariga 18-iyun kuni “Erik” to‘foni shiddatli tarzda yopirildi. Bu haqda BBC xabar berdi.
Meksikaning fuqarolik muhofazasi agentligi ofatning 3-toifali yirik bo‘ronga aylanishidan ogohlantirgan. Hozirda 2-toifadagi bo‘ron Meksika janubidagi ba’zi hududlarga potensial vayronkor shamollar va hayot uchun xavfli toshqinlar olib kelishi mumkin, deb xabar bermoqda AQSH Milliy bo‘ronlar markazi.
Mahalliy vaqt bilan 18-iyun kuni tushdan keyin bo‘ronda maksimal davomli shamol 175 km/soatgacha ko‘tarilgan. Meksika prezidenti Klaudiya Sheynbaum bo‘ron hududidagi aholiga “rasmiy ma’lumotlarga e’tiborli bo‘ling, uyda qoling va ko‘chaga chiqmang”, deya murojaat qildi. 3 va undan yuqori toifadagi bo‘ronlar yirik dovullar hisoblanadi va shamol tezligi soatiga kamida 180 kilometrni tashkil qiladi.
To‘fon Oaxaka va Gerrero shtatlari o‘rtasida aktiv bo‘lishi mumkinligi aytilgan. Kamida 50 sm yomg‘ir yog‘ishi kutilmoqda. Loy ko‘chkilari tik relyefli hududlarda xavf keltirib chiqarishi mumkin. Meksikaning janubiy Tinch okeani sohilidagi Chiapas, Gerrero va Oaxaka shtatlarida 2000 ga yaqin boshpana tashkil etilgan.
“Agar pastqam joylarda, daryolar yaqinida, suv yo‘llari yaqinida bo‘lsangiz, ushbu vaziyat uchun allaqachon tashkil etilgan boshpanalarga borganingiz ma’qul”, dedi Meksika prezidenti Klaudiya Sheynbaum.
Rasmiylarga ko‘ra, dovulning ta’siri Oaxakadagi Puerto Anxel va Gerrerodagi Punta Maldonado o‘rtasidagi Meksika qirg‘oq chizig‘ida eng kuchli bo‘lishi kutilmoqda. Dovulga tayyorgarlik ko‘rish uchun 18 mingdan ortiq qutqaruvchilar safarbar qilingan. Mamlakatda iyun oyining boshidan noyabr oxirigacha to‘fon mavsumi davom etadi.
2023-yil oktyabr oyida Meksikada, Gerrero Tinch okeani sohilida Akapulkoga zarar yetkazgan 5-toifali “Otis” to‘foni sodir bo‘lgandi. O‘shanda kamida 50 kishi halok bo‘lgani aytilgan.
Izoh (0)