AQSH prezidentining Suriya bo‘yicha maxsus vakili Tomas Barrak 2012-yilda elchixona yopilganidan beri ilk bor AQSH elchisi qarorgohi ustida Amerika bayrog‘ini ko‘tardi. Bu haqda Reuters agentligi xabar bermoqda.
Qarorgohning ochilish marosimi Amerika diplomatik missiyasining Suriyaga qaytishini anglatdi.
“Amerikaning maqsadi va prezident Donald Trampning qarashi shundan iboratki, biz bu yosh hukumatga aralashmasdan, talab qo‘ymasdan, shartlar belgilamasdan, madaniyatimizni sizning madaniyatingizga majburlamasdan imkoniyat berishimiz lozim”, dedi Tomas Barrak.
Shuningdek, u Tramp ushbu mamlakatga nisbatan sanksiyalarni bekor qilish qarorini e’lon qilganidan so‘ng AQSHning Suriya bilan aloqalari tezkor sur’atda kengayib borayotganini ta’kidlagan.
Suriya va Isroil o‘rtasidagi munosabatlarga to‘xtalar ekan, Barrak “bu muammoni hal etish mumkinligini” qayd etgan.
“Biroq hamma narsa muloqotdan boshlanadi. Menimcha, biz oddiy hujum qilmaslik to‘g‘risidagi kelishuvdan boshlashimiz, chegaralar va chegara hududlari haqida suhbatlashishimiz kerak”, dedi u.
Suriyada Ahmad ash-Shar’a hokimiyat tepasiga kelgach, G‘arb mamlakatlari prezident Bashar Asad davrida Suriyaga nisbatan joriy etilgan sanksiyalarni yumshatishni boshladi. May oyida Qo‘shma Shtatlar prezidenti Donald Tramp mamlakatga nisbatan sanksiyalarni bekor qilishni buyurdi. Shundan so‘ng AQSH Moliya vazirligi cheklovlarni yengillashtirishga kirishdi.
Suriya prezidenti Ahmad ash-Shar’a va ichki ishlar vaziri Anas Xattobga nisbatan cheklovlar allaqachon bekor qilingan. Shuningdek, Homs va Banias neftni qayta ishlash korxonalari, Tijorat banki, Ko‘chmas mulk banki, hamda kema qatnoviga oid kompaniyalar ham cheklovlardan ozod etildi.
AQSHning Suriyada 2012-yildan beri diplomatik vakolatxonasi bo‘lmagan. O‘shanda Amerikaning Damashqdagi elchixonasi ko‘cha muxolifatining bostirilishiga norozilik belgisi sifatida o‘z faoliyatini to‘xtatgan edi. O‘sha davrda amerikaliklarning manfaatlarini Chexiya diplomatik missiyasi himoya qilgan.
AQSH prezidenti Donald Tramp 14-may kuni Ar-Riyodda Suriya muvaqqat prezidenti Ahmad ash-Shara’a bilan muzokara olib bordi.
Izoh (0)