Pokiston hukumati strategik bitkoin zaxirasini yaratishni va bitkoin mayningini qo‘llab-quvvatlashni rejalashtirmoqda. Bu haqda mamlakatning kriptovalyutalar kengashi rahbari Bilol Saqib ma’lum qildi.
U 28-may kuni Las Vegasda bo‘lib o‘tgan Bitcoin 2025 konferensiyasida tegishli ma’lumot bilan bo‘lishdi. Saqib bitkoin zaxirasini yaratish AQSHdan ilhomlanilganini aytdi. AQSHdagi zaxira dastlab jinoiy va fuqarolik ishlari doirasida musodara qilingan aktivlar hisobiga to‘ldiriladi. Bu aktivlarning umumiy hajmi taxminan 200 ming bitkoin miqdorida baholanmoqda. Pokiston ham AQSH kabi o‘z bitkoinlarini sotmaydi.
Bu hamyon, milliy bitkoin-hamyon bo‘lib, spekulyatsiya yoki hayp uchun mo‘ljallanmagan. Biz bu bitkoinlarni saqlaymiz va hech qachon, hech qachon sotmaymiz, dedi Bin Saqib.
Pokiston hukumati bitkoinlar mayningi va sun’iy intellekt ma’lumot markazlari uchun 2 000 megavatt elektr energiyasini ajratadi.
Biz barcha maynerlarni Pokistonga tashrif buyurishga, barcha infratuzilma ishtirokchilarini biz bilan yaratishga chaqiramiz, dedi u.
Bin Saqib ta’kidlashicha, Pokistonda bitkoinlarning strategik zaxirasini yaratish mamlakatda kripto sanoatini qabul qilishning “bor-yo‘g‘i boshlanishi” bo‘ladi.
Bizda 100 milliondan ortiq odam bank xizmatidan foydalanmaydi. Ularda jamg‘arish va investitsiya qilish uchun vositalar yo‘q va biz buni o‘zgartirmoqchimiz. Biz ularning o‘z iqtisodiy sinflari doirasidan chiqib ketishlarini xohlaymiz. Kriptovalyutalar va blokcheyn bizga ushbu kvant sakrashini amalga oshirishga yordam berishiga ishonaman.
Biz nolikvid aktivlarimizni tokenizatsiya qilmoqchimiz. Biz raqamli identifikatorlarni joriy qilmoqchimiz... Shuning uchun Pokiston o‘ziga ittifoqchi izlamoqda. Pokiston kirish yo‘lini qidirmoqda, chunki Pokiston qurishni xohlaydi, dedi Pokiston kriptovalyutalar kengashi rahbari.
Izoh (0)