АҚШ президентининг Сурия бўйича махсус вакили Томас Баррак 2012 йилда элчихона ёпилганидан бери илк бор АҚШ элчиси қароргоҳи устида Америка байроғини кўтарди. Бу ҳақда Reuters агентлиги хабар бермоқда.
Қароргоҳнинг очилиш маросими Америка дипломатик миссиясининг Сурияга қайтишини англатди.
“Американинг мақсади ва президент Дональд Трампнинг қараши шундан иборатки, биз бу ёш ҳукуматга аралашмасдан, талаб қўймасдан, шартлар белгиламасдан, маданиятимизни сизнинг маданиятингизга мажбурламасдан имконият беришимиз лозим”, деди Томас Баррак.
Шунингдек, у Трамп ушбу мамлакатга нисбатан санкцияларни бекор қилиш қарорини эълон қилганидан сўнг АҚШнинг Сурия билан алоқалари тезкор суръатда кенгайиб бораётганини таъкидлаган.
Сурия ва Исроил ўртасидаги муносабатларга тўхталар экан, Баррак “бу муаммони ҳал этиш мумкинлигини” қайд этган.
“Бироқ ҳамма нарса мулоқотдан бошланади. Менимча, биз оддий ҳужум қилмаслик тўғрисидаги келишувдан бошлашимиз, чегаралар ва чегара ҳудудлари ҳақида суҳбатлашишимиз керак”, деди у.
Сурияда Аҳмад аш-Шаръа ҳокимият тепасига келгач, Ғарб мамлакатлари президент Башар Асад даврида Сурияга нисбатан жорий этилган санкцияларни юмшатишни бошлади. Май ойида Қўшма Штатлар президенти Дональд Трамп мамлакатга нисбатан санкцияларни бекор қилишни буюрди. Шундан сўнг АҚШ Молия вазирлиги чекловларни енгиллаштиришга киришди.
Сурия президенти Аҳмад аш-Шаръа ва ички ишлар вазири Анас Хаттобга нисбатан чекловлар аллақачон бекор қилинган. Шунингдек, Ҳомс ва Баниас нефтни қайта ишлаш корхоналари, Тижорат банки, Кўчмас мулк банки, ҳамда кема қатновига оид компаниялар ҳам чекловлардан озод этилди.
АҚШнинг Сурияда 2012 йилдан бери дипломатик ваколатхонаси бўлмаган. Ўшанда Американинг Дамашқдаги элчихонаси кўча мухолифатининг бостирилишига норозилик белгиси сифатида ўз фаолиятини тўхтатган эди. Ўша даврда америкаликларнинг манфаатларини Чехия дипломатик миссияси ҳимоя қилган.
АҚШ президенти Дональд Трамп 14 май куни Ар-Риёдда Сурия муваққат президенти Аҳмад аш-Шараъа билан музокара олиб борди.
Изоҳ (0)