AQSH davlat departamenti terrorizmga qarshi kurashda yordam bermagani uchun Kuba bilan mudofaa aloqalarini uzib, unga “to‘liq hamkorlik qilinmaydigan davlat” nomini berdi. Bu haqda Fox News xabar berdi.
Kuba 2024-yilda 11 nafar qochqinni AQSHga topshirmagani bunga sabab qilib ko‘rsatilmoqda. Qo‘shma Shtatlar davlat departamenti matbuot kotibi Temmi Bryus 13-may kuni “Qurol-yarog‘ eksporti nazorati to‘g‘risidagi” qonunga asoslanib Kubaga mudofaa xizmatlarini sotish yoki eksport qilish uchun litsenziya berish taqiqlanishini ma’lum qilgan.
“2024-yilda Kuba terrorizmga qarshi kurashda Qo‘shma Shtatlar bilan hamkorlik qilmadi. Kubada kamida 11 nafar amerikalik suddan qochganlar bor. Kuba hukumati esa ularni mamlakatimizga qaytarmasligini ma’lum qildi,” dedi Bryus o‘z bayonotida.
AQSH davlat kotibi Marko Rubio nafaqat Kubani, balki Eron, Suriya, Venesuela va Shimoliy Koreyani “to‘liq hamkorlik qilinmaydigan davlat”lar qatoriga kiritib qo‘ygan.
2025-yil yanvar oyida Donald Tramp hokimiyatga kelmasdan avval Bayden ma’muriyati Kubani terrorizmga homiylik qiluvchi davlatlar qatoridan chiqargan edi.
Izoh (0)