AQSH hukumati samaradorlik departamenti (DOGE) rahbari Ilon Mask o‘z lavozimini tark etayotganini e’lon qildi. U bu haqda X ijtimoiy tarmog‘idagi sahifasida yozib qoldirdi.
Maxsus hukumat xodimi sifatidagi belgilangan muddatim yakunlanar ekan prezident Trampga behuda xarajatlarni qisqartirish imkoniyatini berganidan minnatdorlik bildirmoqchiman. DOGE vazifasi vaqt o‘tishi bilan yanada mustahkamlanib boradi, chunki u butun hukumat tizimida hayot tarziga aylanadi, deb yozgan Mask.
U Trampning soliq imtiyozlarini uzaytirish va AQSHdagi immigratsiyani qat’iy nazorat qilishga doir qonun loyihasini tanqid qilganidan keyin bu qarorini e’lon qildi. Uning tanqidiy munosabati 28-may kuni CBC telekanalida uzatildi.
Maskka ko‘ra, mazkur qonun loyihasi “keng ko‘lamli xarajatlar to‘g‘risidagi qonun loyihasi” hisoblanadi. Bu federal defitsitni oshiradi va DOGE “faoliyatiga putur yetkazadi”. Oq uydagi anonim manba Maskning o‘z lavozimini tark etayotganini tasdiqlagan.
Maskning DOGE rahbari sifatidagi faoliyati minglab ishdan bo‘shatish, davlat idoralari va dasturlarini tugatishni o‘z ichiga olgan. Mask o‘z ishini Oq uy xarajatlarini 2 trillion dollardan 1 trillion dollargacha qisqartirish haqidagi bayonotlardan boshlagan. Amalda ularni 150 milliard dollarga qisqartirgan va federal amaldorlarning qarshiligidan norozi bo‘lgan, deb yozadi AP.
Dunyoning eng boy milliarderi Ilon Maskning boyligi 29-may holatiga ko‘ra, so‘nggi bir kunda 3,6 milliard dollarga oshib, 428,6 milliard dollarga yetgan.
Izoh (0)