Suriya rasmiylari Bashar Asad davridayoq joriy etilgan sanksiyalarni bekor qilish uchun Amerika kompaniyalariga tabiiy resurslarini o‘zlashtirish imkoniyatini berishga tayyor. Bu haqda manbalarga tayanib The Times xabar berdi.
AQSH prezidenti Donald Tramp Saudiya Arabistonida Suriya muvaqqat prezidenti Ahmad ash-Shara’a bilan uchrashishi mumkin. Manbalarga ko‘ra, Suriyaning yangi rahbari Ibrohim kelishuviga qo‘shilish masalasini muhokama qilishi mumkin. Mazkur kelishuv Isroilning BAA, Bahrayn, Marokash va Sudan kabi bir qator arab davlatlari bilan munosabatlarini normallashtirishga qaratilgan. Ahmad ash-Shara’a Isroilning Suriya janubi-g‘arbiy chegaralarida, Golan tepaliklari hududida doimiy mavjudligiga rozi bo‘lishga tayyorligi ta’kidlanmoqda.
Suriyaning AQSH bilan tabiiy resurslardan foydalanishni o‘z ichiga olgan strategik hamkorlikni yo‘lga qo‘yish rejalari haqidagi ma’lumotni Reuters ham tasdiqlagan. 30-aprel kuni ash-Shara’a bilan uchrashgan amerikalik biznesmen Jonatan Bass bu haqda ma’lumot bergan. U Suriyaning muvaqqat prezidenti “mamlakat kelajagi uchun” kelishuvga erishmoqchiligini aytgan.
U (ash-Shara’a) Damashqda Trump Tower qurilishi haqida gapirdi va qo‘shnilar bilan tinchlikka tayyorligini bildirdi, degan Bass.
Trampning Yaqin Sharq davlatlariga tashrifi bilan tanish bo‘lgan Reuters manbasiga ko‘ra, haqiqatan ham AQSH va Suriya vakillari o‘rtasida uchrashuv rejalashtirilmoqda. Biroq Tramp va ash-Shara’a o‘rtasida to‘g‘ridan to‘g‘ri muzokaralar rejalashtirilmagan. Suriya yetakchisiga yaqin bo‘lgan yana bir suhbatdoshi bunday uchrashuv bo‘lishi mumkinligini istisno etmagan.
Bashar Asad 2024-yil dekabr oyida hokimiyatdan ag‘darilgan edi. Hokimiyatni qo‘ldan boy bergach, Suriya hududini tark etdi va Rossiyadan siyosiy boshpana oldi. Mamlakatda o‘tish davri hukumati tuzilib, qurolli muxolifatning sobiq yetakchisi va “Hay’at Tahrir ash-Shom” guruhi rahbari, Abu Muhammad al-Juloniy nomi bilan ham tanilgan Ahmad ash-Shara’a muvaqqat prezident bo‘ldi.
Izoh (0)