Isroil 28-may kuni Birlashgan Millatlar Tashkilotini G‘azoga yordam yetkazilishiga to‘sqinlik qilayotganlikda aybladi. Bu haqda Al Arabiya xabar berdi.
BMT esa bu ayblovga javoban Isroil ruxsat bergan cheklangan yordamni to‘plash uchun bor kuchini sarflayotganini bildirgan.
G‘azodagi gumanitar ahvol nihoyatda og‘ir — oziq-ovqat xavfsizligi bo‘yicha mutaxassislar har besh kishidan biri ocharchilik yoqasida turganini ma’lum qilgan.
“BMT vahima tarqatib, haqiqatdan uzoq bayonotlar berayotgan bir paytda, Isroil davlati G‘azoga yordam kirishini izchil ta’minlamoqda”, dedi Isroilning BMTdagi elchisi Danni Danon Xavfsizlik kengashida.
Unga ko‘ra, yordam so‘nggi haftadan beri Isroil tomonidan cheklangan ruxsat asosida Kerem Shalom chegara o‘tkazish punkti orqali yuk mashinalarida kirib kelmoqda. AQSH va xalqaro hamkorlar bilan birgalikda ishlab chiqilgan yangi taqsimot mexanizmi orqali ham yordam tarqatilmoqda. BMT esa bu tizimni o‘zining gumanitar tamoyillariga zid deb biladi.
27-may kuni G‘azo gumanitar jamg‘armasi (G‘GJ) markazida yordam tarqatish chog‘ida yuz bergan tartibsizlikda 47 kishi jarohat olgan. Isroil elchisi bu hodisada HAMASni ayblab, Falastin guruhi taqsimlash markaziga kirishni to‘sib qo‘yish uchun yo‘l to‘siqlari va blokpostlar o‘rnatganini aytgan.
“BMT bu yangi gumanitar mexanizmda qatnashayotgan nodavlat notijorat tashkilotlarga bosim, tahdid va jazolash choralarini qo‘llayapti”, dedi Danon BMTni yordamga to‘sqinlik qilishga urinishda ayblab.
Shuningdek, Danon BMTni G‘GJ bilan ishlayotgan nodavlat tashkilotlarni G‘azoda faoliyat yurituvchi tashkilotlar ro‘yxatidan olib tashlaganlikda ham ayblagan. BMT bu da’voni rad etgan.
“Hozirgi ro‘yxat bilan G‘GJ boshlanishidan oldingi ro‘yxat o‘rtasida hech qanday farq yo‘q. Biz o‘z gumanitar tamoyillarimizga mos kelmaydigan operatsiyalarda ishtirok eta olmaymiz”, dedi BMT bosh kotibining vakili Stefan Dujarrik.
Shuningdek, u BMT Kerem Shalom orqali kelayotgan yordamni to‘plash uchun bor imkoniyatlarini ishga solayotganini qo‘shimcha qildi.
O‘tgan haftadan beri Isroil tomonidan oziq-ovqat ortilgan 800 ta yuk mashinasiga ruxsat berilgan. Biroq Dujarrikning aytishicha, ularning 500 tasigina G‘azoga kirgan. Danon esa “400 dan ortiq yuk mashinasi” allaqachon chegara osha o‘tganini, Isroil esa yordam taqsimoti uchun “xavfsiz yo‘llar” yaratganini ta’kidlagan.
Isroilning G‘azodagi harbiy harakatlari natijasida, hozirgacha 54804 kishi halok bo‘lgan, ularning aksariyati tinch aholi. Isroil bu harakatlarni 2023-yil 7-oktabr kuni HAMAS tomonidan uyushtirilgan hujumga javoban boshlagan.
Izoh (0)