Yaqin o‘tmishda xorijda o‘qigan o‘zbekistonlik yoshlar barmoq bilan sanarli bo‘lgan bo‘lsa, bugun ular jamiyatning eng faol, maqsadli va tashabbuskor qatlamiga aylanib ulgurdi.
Ular xalqaro dasturlar orqali nafaqat bilim olishyapti, balki o‘z yurti uchun ilhom manbaiga ham aylanmoqda. Bugungi hikoyamiz Amerikada maktab, O‘zbekistonda universitet, xalqaro loyihalar, seminarlar va ta’limga bag‘ishlangan Gulasal Butayeva hayoti haqida.
“Men katta hayotga qadam qo‘yishim qanaqadir zo‘r paytga to‘g‘ri keldi”, deydi o‘quv markazi o‘qituvchisi Gulasal Butayeva.
Qashqadaryolik qiz hayotidagi ilk burilish aynan 9-sinfda sodir bo‘ladi. O‘zbekistonda uzoq yillar yopiq bo‘lgan FLEX dasturi aynan o‘sha yil qayta yo‘lga qo‘yiladi. Bu dasturning ilk ishtirokchilaridan biri sifatida Gulasal AQSHning Nyu York shtatidagi Irondequoit High School’da bir yil davomida o‘qiydi.
“Amerikada mustaqil yashash, ingliz tilida fikrlash, tanimagan odamlar bilan tezda aloqa o‘rnatish — hayotimni o‘zgartirdi. O‘zimga bo‘lgan ishonch aynan o‘sha davrda shakllandi”, deya eslaydi u.
O‘z faoliyati davomida Gulasal TechGirls dasturiga ham tanlab olinadi. AQSH Davlat departamenti tomonidan o‘tkaziladigan mazkur nufuzli dastur doirasida u 12 mamlakatdan kelgan tengdoshlari bilan texnologiyalar, liderlik va madaniyatlararo muloqot bo‘yicha chuqur bilim oladi. Oradan ko‘p o‘tmay, u TechGirls alumnae kengashida ofitser, keyin esa katta maslahatchi sifatida faoliyat yuritadi.
2022-yil Qarshida ijtimoiy himoyaga muhtoj o‘quvchilar uchun BraveCoders nomli dasturlash bo‘yicha bootcamp tashkil etiladi. Bu loyiha orqali Gulasal uch hafta davomida o‘quvchilarga frontend va backend asoslarini o‘rgatadi, kompaniyalarga tashriflar, mehmonlar bilan uchrashuvlar uyushtiradi. Qahramonimizning ushbu loyihasi AQSHdagi Legacy International xalqaro tashkiloti tomonidan “Outstanding Project Award” bilan taqdirlanadi.
U faoliyati davomida Vashingtonda bo‘lib o‘tgan Davlat departamentining katta brifingida 250 dan ortiq diplomat va talabalar oldida nutq so‘zlash sharafiga muyassar bo‘lgan. CyberStart America dasturlash marafonlaridan tortib, WSIS Forum’dagi Python treninglargacha, Edukhan onlayn maktabidagi faoliyatidan American Corner Qarshi’dagi volontyorlik ishlari — bularning barchasi Gulasal hayotidagi ajralmas bosqichlar bo‘lib, qahramonimiz har bir bosqichda yangi tajriba orttirdi va bugungidek o‘z sohasining eng oldi mutaxassisi bo‘lib shakllandi.
Toshkentdagi Xalqaro Vestminster universitetida “Business Information Systems” yo‘nalishida 2-bosqichda tahsil olayotgan Gulasal ayni paytda o‘quv markazida ham ingliz tili o‘qituvchisi sifatida faoliyat yuritmoqda. IELTS imtihoni topshiradiganlar ichida maksimal ball olganlar “niner” (to‘qqizchi) deyiladi. Gulasal ishxonasida shunday natija qayd etgan to‘qqiz nafar mutaxassisdan biri sifatida katta hurmatga ega.
Ma’lumot uchun: hozirda O‘zbekistonda atigi 3 nafar ayol “niner” bo‘lib, ulardan eng yoshi Gulasaldir. Bugun Gulasal o‘zini nafaqat ingliz tili o‘qituvchisi, balki texnologiyalar orqali ayollar hayotiga ijobiy ta’sir ko‘rsata oladigan yosh lider sifatida ko‘radi. Uning hikoyasi — kuchli iroda, rejalashtirilgan harakat va imkoniyatdan to‘g‘ri foydalanish namunasi.
“Men rejalashtirishni yaxshi ko‘raman. Eng oddiy kun ham qandaydir foydali natija bilan tugashi kerak. Ayollar til bilishi kerak, ular ham texnologiyada yashay olishi kerak — bu meni ishonchim, orzum va maqsadim. Bu yo‘lda prezidentimizning rahbar ayollarga ko‘rsatayotgan e’tibori menga ilhom bo‘lyapti. Men ham kelajakda o‘z kompaniyamni barpo etib, mamlakatimizning kiberxavfsizligi yo‘lida xizmat qilishni, kiber frontda turib, yurtimiz va fuqarolarimizni raqamli tahdidlardan himoya qilishni istayman”, deydi qahramonimiz.
Bu hikoya faqat yutuq va muvaffaqiyatlar haqida emas, balki mashaqqatli mehnat, qat’iyat, to‘g‘ri qarorlar va eng muhimi, imkoniyatlardan foydalanishni bilish haqida. Gulasal hali juda yosh. Ammo bosib o‘tgan yo‘li, o‘zlashtirgan tajribasi va yuragidagi katta orzular uni kelajakdagi ijtimoiy o‘zgarishlar, ilm-fan va ta’lim sohasidagi ilg‘or tashabbuslarning yetakchisiga aylantirmoqda.
U faqat o‘z yo‘lini topgani yo‘q — u orqasidan kelayotganlar uchun ham yo‘l ochmoqda. Uning har bir qadami nafaqat o‘zi uchun, balki kelajak avlod uchun ham zamin bo‘lib xizmat qilishiga ishonch bildiramiz.
Izoh (0)