Amerika Qo‘shma Shtatlari prezidenti Donald Tramp Xitoylik talabalarning vizalarini bekor qilishini ma’lum qildi. Bu haqda BBC xabar berdi.
AQSH davlat kotibi Marko Rubio bayonotida bu choralar Xitoy Kommunistik partiyasi bilan aloqasi bor yoki jiddiy sohalarda tahsil olayotgan talabalarni o‘z ichiga olishini aytgan.
Shuningdek, u vizalarni berish mezonlari ham qayta ko‘rib chiqilishini va Xitoy hamda Gonkongdan keladigan kelajakdagi talabalar uchun tekshiruv kuchaytirilishini qo‘shimcha qilgan.
So‘nggi oylarda AQSH va Pekin o‘rtasidagi munosabatlar keskin yomonlashgan. Bunga sabab — Tramp joriy qilgan boj tariflari bilan boshlangan savdo urushi deya qaralmoqda. 26-may kuni Rubio butun dunyodagi AQSH elchixonalariga xitoylik talabalar uchun viza intervyularini vaqtincha to‘xtatishni buyurgan.
Hisob-kitoblarga ko‘ra, 2024-yili AQSHda tahsil olayotgan Xitoylik talabalar soni qariyb 280 ming nafarni tashkil etgan.
Xitoy fuqarolari ilgari AQSH universitetlarida o‘qiyotgan xorijiy talabalar orasida eng katta ulushga ega bo‘lgan edi. Biroq pandemiya davridagi cheklovlar va AQSH-Xitoy munosabatlarining yomonlashuvi fonida bu ko‘rsatkich so‘nggi yillarda pasaygan.
“Prezident Tramp rahbarligida AQSH davlat departamenti Ichki xavfsizlik vazirligi bilan birga xitoylik talabalar, xususan, Xitoy Kommunistik partiyasi bilan aloqasi borlar yoki jiddiy sohalarda o‘qiyotganlarning vizalarini ‘tajovuzkorlik’ bilan bekor qiladi. Bundan tashqari, Xitoy va Gonkongdan keladigan barcha kelgusidagi viza arizalarini yanada sinchikov ko‘rib chiqish uchun mezonlar yangilanadi”, dedi Rubio 28-may kungi qilgan bayonotida.
Tramp administratsiyasi ilgari ham bir qancha xorijlik talabalarning deportatsiya qilinishini targ‘ib qilgan va minglab vizalarni bekor qilgan edi. Ammo bu harakatlarning aksariyati sudlar tomonidan to‘xtatilgan.
Shuningdek, hukumat tomonidan universitetlarga ajratiladigan yuzlab million dollar mablag‘ muzlatib qo‘yilgan. Tramp AQSHdagi eng nufuzli universitetlarni, jumladan, Garvardni o‘ta “liberal”likda ayblab, ularni kampuslardagi antisemitizmga qarshi kurashda sustkashlikda tanqid qilgan.
Ko‘plab AQSH universitetlari xorijlik talabalar to‘laydigan yuqori kontrakt to‘lovlari hisobiga moliyaviy barqarorlikni saqlab turadi.
BBC’ga intervyu bergan ba’zi talabalar AQSHda o‘qishni tanlaganlari uchun afsusda ekanliklarini bildirgan.
“Biz AQSHni barcha xalqaro, jumladan, xitoylik talabalarining qonuniy huquq va manfaatlarini chin dildan himoya qilishga chaqiramiz”, deb munosabat bildirgan Xitoy rasmiysi.
Izoh (0)