AQSH Suriyaning yangi hukumati bilan bog‘liq bir qator moliyaviy operatsiyalarni, jumladan, energetika resurslari va pul o‘tkazmalariga oid operatsiyalarni sanksiyalar doirasidan chiqardi. AQSH Moliya vazirligi tegishli bayonotni e’lon qildi.
Suriya hukumatiga ilgari taqiqlangan operatsiyalarni amalga oshirish uchun 2025-yil 7-iyulgacha ruxsat berilgan. Bu arab respublikasining Markaziy banki orqali amalga oshiriladigan energiya resurslari bo‘yicha bitimlarni o‘z ichiga oladi.
Bu qaror bilan AQSH sanksiyalari ostidagi shaxslarning mol-mulki yoki mulkiy manfaatlarini blokdan chiqarilmaydi. Sanksiyalar ostidagi mamlakatlar bilan moliyaviy o‘tkazmalarni amalga oshirish imkoni bo‘lmaydi.
“Bashar Asadning shafqatsiz va repressiv boshqaruvi tugashi Suriya va uning xalqiga tiklanish uchun noyob imkoniyat beradi. Ushbu o‘tish davrida Moliya vazirligi Suriyada insonparvarlik yordami va mas’uliyatli boshqaruvni qo‘llab-quvvatlashda davom etadi”, deydi AQSH moliya vaziri o‘rinbosari Uolli Adeyemo.
Hozirda Suriyaning deyarli butun aholisi qashshoqlik chegarasidan pastda yashaydi. Taxminan 75 foizi kuniga kishi boshiga 3,65 dollardan kam, 33 foizi esa 2,15 dollardan kam mablag‘ bilan kun kechirmoqda.
2011-yilda boshlangan fuqarolar urushigacha Suriya yirik neft eksportchisi bo‘lib, bundan yiliga 3-5 milliard dollar daromad olgan, asosiy xaridorlari Yevropa mamlakatlari edi. Suriyaning yangi hukumati ko‘plab neft konlari ustidan nazoratni yo‘qotgan. Bu konlar asosan respublikaning shimoli-sharqida joylashgan bo‘lib, ularni hali ham Damashqning yangi hokimiyatiga bo‘ysunmaydigan kurd kuchlari nazoratida.
Izoh (0)