Rafah janubidagi yangi gumanitar yordam taqsimlash punktiga yopirilib kirgan olomonga Isroil harbiylarining o‘q uzishi oqibatida kamida bir falastinlik halok bo‘ldi, yana 48 nafari jarohat oldi. Bu haqda Associated Press xabar bermoqda.
28-may kuni Isroil va AQSH ko‘magida tashkil etilgan G‘azo insonparvarlik jamg‘armasi G‘azo sektoriga yordam tarqatishni boshlaganini ma’lum qildi.
Ma’lum qilinishicha, voqea paytida Isroil harbiylari tanklar va artilleriyadan o‘q uzgan, Isroil vertolyotidan esa yoritgich raketalar otilgan. BMTning Inson huquqlari bo‘yicha boshqarmasi vakili Ajit Sungayning ma’lum qilishicha, 47 nafar yaradorning aksariyati o‘qotar quroldan jarohat olgan.
Isroilning yangi tuzilmaning xavfsizligi va samaradorligi haqidagi bayonotlariga qaramay, BMT qatori xalqaro gumanitar tashkilotlar ham uning ishida ishtirok etishdan bosh tortdi. Ularning ogohlantirishicha, bu tizim G‘azo sektoridagi 2,3 million aholining ehtiyojlariga javob bermaydi va undan aholiga bosim o‘tkazish uchun foydalanilishi mumkin.
Ularning fikricha, hududiy shart-sharoitlar bilan bog‘liq oziq-ovqat ustidan nazorat qilish insonparvarlik tamoyillari va xalqaro huquq normalarini buzadi.
G‘azo gumanitar jamg‘armasi tomonidan 4 ta markaz ochilgan bo‘lib, ayni paytda ulardan ikkitasi faoliyat yuritmoqda. Ularni xususiy pudrat kompaniyalari qo‘riqlaydi. Kirish esa harbiy obyektlarni eslatuvchi tor yo‘laklar orqali tashkil etilgan. Jamg‘armaning ta’kidlashicha, uning qo‘riqchilari voqea paytida kuch ishlatmagan va hududni tark etgan.
Ayni paytda Isroil qo‘shinlari Rafah va anklavning qolgan qismi o‘rtasidagi bufer harbiy zona - Morag yo‘lagi deb ataladigan hududda patrul xizmatini davom ettirmoqda.
Isroil bosh vaziri Binyamin Netanyaxu vaziyatga izoh berar ekan, “ma’lum vaqt davomida nazorat qisman yo‘qolganini” tan olgan, biroq vaziyat tez orada barqarorlashganini qo‘shimcha qilgan. Shuningdek, u HAMAS bilan janglar davom etayotgan bir paytda butun anklav aholisini sektor janubidagi “xavfsiz zona”ga ko‘chirish niyatini takrorlagan.
Xalqaro tashkilotlar gumanitar inqiroz sharoitida falastinliklarni ta’minlashning yagona samarali va axloqiy jihatdan maqbul usuli bo‘lib qolayotgan avvalgi mustaqil yordam tarqatish tarmog‘ini saqlab qolishni talab qilishda davom etmoqda.
Jahon sog‘liqni saqlash tashkiloti G‘azo sektoridagi barcha shifoxonalarning kamida 94 foizi shikastlangan yoki vayron etilgan, Falastin anklavi shimolida yashovchilar deyarli har qanday tibbiy yordam olish imkoniyatidan mahrum bo‘lgani bildirgandi.
20-may kuni Buyuk Britaniya Isroil armiyasining G‘azo sektoridagi yangi operatsiyasi sababli Isroil bilan erkin savdo bitimini tuzish bo‘yicha muzokaralarni to‘xtatdi.
Izoh (0)