“Tolibon” jamoat ishlari vaziri Muhammad Iso Soniy Afg‘onistondagi Rossiya elchisi Dmitriy Jirnov bilan muzokaralar o‘tkazdi. Uchrashuvda sovet muhandislari tomonidan qurilgan, strategik ahamiyatga ega Salang shossesini qayta qurish va u yerda yangi avtomobil yo‘li uchun tunnel barpo etish masalalari muhokama qilindi. Bu haqda Interfaks xabar berdi.
Tomonlar Rossiyadan infratuzilma loyihalari uchun zarur bo‘lgan asbob-uskunalar, qurilish texnikasi, materiallar, jumladan bitum va temir yo‘l tarkibiy qismlari yetkazib berish masalasini ham ko‘rib chiqdi.
Rossiya elchisi o‘z mamlakatining ushbu sohalarda hamkorlikka tayyor ekanini bildirdi, deyiladi Afg‘oniston jamoat ishlari vazirligi bayonotida.
“Tolibon” delegatsiyasi tashabbuslarni yanada batafsil muhokama qilish uchun Rossiyaga tashrif buyurishni rejalashtirmoqda.
Salang tunneli — Salang dovoni orqali mamlakatning janubiy va shimoliy hududlarini bog‘laydigan Afg‘onistonning eng muhim transport arteriyasidir. U 1958—1964-yillarda sovet muhandislari tomonidan qurilgan va hozirga qadar Afg‘oniston yo‘l tizimining asosiy bo‘g‘ini bo‘lib qolmoqda.
Bu “Tolibon” vakillari Moskvaga infratuzilma tashabbuslarida ishtirok etishni taklif qilayotgan birinchi holat emas. 2023-yilda afg‘on tomoni Rossiya va Qozog‘istonni Transafg‘on temir yo‘lini qurish loyihasida ishtirok etishga chaqirgan. O‘shanda “Tolibon” tomonidan tashkil etilgan Savdo va sanoat vazirligi ta’kidlashicha, loyiha nafaqat Afg‘oniston, balki boshqa mamlakatlar uchun ham manfaatli edi.
“Tolibon” harakati 2021-yilda AQSH qo‘shinlari Afg‘onistonni tark etganidan so‘ng mamlakatda hokimiyatni qo‘lga kiritdi. Shunga qaramay ular tuzgan hukumat hech bir davlat, jumladan Rossiya tomonidan tan olinmagan. Bunga inson huquqlarining muntazam ravishda buzilishi, inklyuziv siyosiy tizimni yaratishdan bosh tortish va boshqa masalalar sabab bo‘lmoqda.
Izoh (0)