O‘zbekiston va Afg‘onistonning o‘zaro savdo hajmini 3 milliard dollarga yetkazish bo‘yicha aniq chora-tadbirlar belgilandi. Bu haqda Investitsiyalar, sanoat va savdo vazirligi matbuot xizmati xabar bermoqda.
Ma’lum qilinishicha, 1-mart kuni O‘zbekiston investitsiyalar, sanoat va savdo vaziri Laziz Qudratov Surxondaryo viloyatidagi “Termiz” xalqaro savdo markaziga tashrif buyurgan Afg‘oniston savdo vaziri Nuruddin Aziziy boshchiligidagi delegatsiya bilan uchrashuv o‘tkazdi.
Konstruktiv fikr almashish chog‘ida ikki tomonlama O‘zbekiston—Afg‘oniston savdo-iqtisodiy munosabatlarining bugungi holati va uni rivojlantirish istiqbollari muhokama qilindi. Suhbat davomida o‘zaro savdo hajmini 3 milliard dollarga yetkazish bo‘yicha aniq chora-tadbirlar belgilandi.
-wF7A5E3f.jpg)
Savdo bilan bir qatorda qishloq xo‘jaligi, to‘qimachilik, farmatsevtika, oziq-ovqat va tog‘-kon sanoati sohalarida ham o‘zaro manfaatli hamkorlik va sanoat kooperatsiyasini kengaytirish bo‘yicha navbatdagi tadbirlar ko‘rib chiqildi.
Tashrif doirasida har ikki tomondan 60 ga yaqin tadbirkorlar ishtirokida B2B muzokaralari tashkil etilib, unda ishbilarmon doiralar vakillari yangi aloqalarni o‘rnatish, yangi qo‘shma loyihalar va savdo shartnomalarini amalga oshirishning amaliy jihatlarini muhokama qilish imkoniga ega bo‘ldi.
“Termiz” xalqaro savdo markazi 2024-yilning avgustida ochilgandi. U Markaziy Osiyodagi birinchi erkin savdo zonasi hisoblanadi. Zonada barcha davlat fuqarolarining 15 kun davomida O‘zbekistonga kirish vizasini rasmiylashtirmasdan kirish va chiqish imkoniyati, savdo va xizmatlarni sotishda multivalyuta tizimi va markaz hududiga keluvchi tovarlarni “bojxona to‘lovlarisiz” joylashtirish rejimi joriy etilgan. Xalqaro ekspert va mutaxassislar ushbu erkin savdo zonasiga yiliga 1,5 million tashrif buyuruvchilar kelishi hamda yillik savdo aylanmasi qariyb 1 mlrd dollarga yetkazish salohiyati mavjudligini qayd etgan.
2024-yil oktyabridan ikki mamlakat o‘rtasida imtiyozli savdo kelishuv bitimi ishga tushgan. Bitim doirasida kelishilgan qator mahsulotlarga, shu jumladan, Afg‘onistonda qishloq xo‘jaligi mahsulotlari, gilamlarga, ayrim qurilish materiallariga import bojlari bekor qilingan.
O‘zbekiston—Afg‘oniston savdo aylanmasini oshirish rejasi
Bosh vazir Abdulla Aripov 2024-yil avgustida Kobulga tashrifi davomida o‘tkazilgan muzokaralarda Afg‘oniston bilan savdo aloqalarini rivojlantirish, energetika sohasidagi samarali hamkorlik aloqalarini yangi bosqichga olib chiqish, mis, temir, neft-gaz konlarini birgalikda o‘zlashtirish loyihalarini amalga oshirish, shuningdek, transport-logistika, qishloq va suv xo‘jaligi, ta’lim, hududlararo munosabatlarni yanada chuqurlashtirish yuzasidan fikr almashilgandi. O‘zaro savdo aylanmasini 2024-yilda 1 milliard dollarga, yaqin istiqbolda esa 3 milliard dollarga yetkazish bo‘yicha barcha imkoniyatlar mavjudligi ta’kidlangandi.
Afg‘oniston savdo vaziri Nuruddin Aziziy ham O‘zbekiston bilan savdo hajmini yiliga 3 milliard dollarga yetkazish bo‘yicha ishlar olib borilayotgani aytgandi.
2025-yil 22-fevral kuni Toshkentda Abdulla Aripov “Tolibon” bosh vazirining iqtisodiy masalalar bo‘yicha o‘rinbosari Abdul G‘ani Barodar bilan ikki tomonlama muzokaralar o‘tkazdi. Uchrashuvda o‘zaro manfaatli aloqalarni yanada kengaytirish, savdo-iqtisodiy, energetika, transport va boshqa sohalarda hamkorlikni rivojlantirish masalalari yuzasidan fikr almashildi.
Shu kuni Abdul G‘ani Barodar O‘zbekiston bosh vaziri o‘rinbosari Jamshid Xo‘jayev bilan ham uchrashdi. Uchrashuvda savdo-tranzit aloqalarini kengaytirish, o‘zbekistonlik investorlarning Afg‘onistonga investitsiya kiritishi masalalari muhokama qilindi. O‘zbekiston tomoni ikki tomonlama savdo aloqalarini faollashtirish maqsadida ikki davlat chegarasida qo‘shma savdo zonasini tashkil etishga tayyorligini aytgan.
Izoh (0)