Rossiya “Tolibon” harakatini tan olgach, Afg‘onistonning Shanxay hamkorlik tashkilotiga a’zolik nomzodini qo‘llab-quvvatlaydi. Bu haqda Rossiya prezidentining Afg‘oniston bo‘yicha maxsus vakili Zamir Kabulovga tayanib, “TASS” xabar berdi.
“Ammo bu faqat tan olish masalasi emas. SHHT birinchi navbatda iqtisodiy tashkilotdir. Shuning uchun Kobul o‘z iqtisodini tartibga keltirishi kerak, shunda tashkilotning qolgan aʼzolari Afg‘onistonning a’zoligini maqsadga muvofiq deb hisoblaydi”, — dedi Kabulov.
Hozirda Afg‘oniston SHHTda kuzatuvchi davlat maqomiga ega. Ammo hech bir davlat “Tolibon” hukumatini tan olmagani uchun harakat vakillari tashkilot yig‘ilishlarida qatnasha olmaydi. Rossiya Tashqi ishlar vazirligi va Adliya vazirligi 27-may kuni prezident Vladimir Putinga “Tolibon”ni taqiqlangan tashkilotlar ro‘yxatidan chiqarishni tavsiya qilgan. Ertasi kuni Toshkent aeroportida matbuotga nutq so‘zlagan Rossiya prezidenti “Tolibon” hozirda butun Afg‘onistonni nazorat qilayotgani uchun “Moskva o‘z vakillari bilan munosabatlarni bugungi voqelikdan kelib chiqib yo‘lga qo‘yishini” aytgan. 3-iyun kuni Qozog‘iston “Tolibon”ni terrorchi tashkilotlar ro‘yxatidan chiqargan.
Xitoy, Rossiya, Qozog‘iston, Qirg‘iziston, Tojikiston, O‘zbekiston, Eron, Hindiston va Pokiston Shanxay hamkorlik tashkilotiga aʼzo. Afg‘oniston va yana to‘rt davlat ushbu tashkilotga kuzatuvchi sifatida taklif etilgan.
Izoh (0)