“Tolibon” yetakchisi Haybatulloh Oxundzoda 30-mart kuni Ramazon hayiti munosabati bilan qilgan murojaatida aholini xavfsizlik uchun shukronalik keltirishga chaqirdi. Bu haqda “Daryo” muxbiri xabar berdi.
Afg‘onistondagi masjidlarida minglab namozxonlar ishtirokida hayit namozi o‘qildi. “Tolibon”ning Haj va hidoyat vazirligi masjid voizlaridan “Tolibon” yetakchisining murojaatini tushuntirishni so‘radi.
Ramazon hayiti munosabati bilan “Tolibon”ga aloqador ommaviy axborot vositalari tomonidan e’lon qilingan murojaatda “Afg‘oniston bo‘ylab xavfsizlik ta’minlangani va odamlar shukr qilishi kerakligi” ta’kidlangan.
Hayit tabrigining yana bir qismida “Tolibon” yetakchisi mamlakatdagi ta’lim “shariat va yoshlarning islomiy e’tiqodlari asosida faoliyat yuritishi kerak”ligini aytgan. Ammo u hayit tabriklarida qizlar va ayollarning ta’lim olishi, maktab va oliy o‘quv yurtlari esa qayta ochilishi haqida gapirmagan.
“Daryo” muxbiri Afg‘onistonning Mozori Sharif shahri aholisi bilan Ramazon oyi qanday o‘tgani borasida ham suhbatlashgan edi. Aholi bu oyda qashshoqlik va ishsizlikdan aziyat chekkan bo‘lib, og‘ir iqtisodiy, ijtimoiy va siyosiy vaziyat sabab kundalik taom tayyorlashda qiyinchilikka duch kelishgan.
Mozori Sharif shahrida yashovchi 12 yoshli Naqibulla “Daryo” muxbiri bilan suhbatda otasini urushlarda yo‘qotgani, shu sababli iqtisodiy muammolarga duch kelganini ma’lum qilgan. “Iftorda ham, saharlikda ham ovqatimiz yo‘q”, dedi Naqibulla.
Ro‘za tutishga odatlanib qolganmiz, chunki Ramazon oyi bo‘lmasa ham, ko‘p kecha-yu kunduz och qolamiz, och uxlaymiz, deya qo‘shimcha qilgan bolakay.
Munis ismli yana bir erkak iftor payti turli taomlar pishirib, yurtdoshlariga yordam berishini aytgan edi.
Izoh (0)