Tojikiston “Tolibon”ning SHHT ishida ishtirok etishiga qarshi chiqdi. Bu haqda Rossiya Tashqi ishlar vazirligi Osiyo departamenti direktori Zamir Kabulov bergan maʼlumotga asoslanib, Asia Plus manbasi xabar berdi.
Manbada aytilishicha, 2024-yil 20—21-may kunlari Qozog‘istonning Ostona shahrida bo‘lib o‘tgan SHHTga aʼzo davlatlar tashqi ishlar vazirlari kengashida “SHHT-Afg‘oniston” guruhi ishini tiklash masalasi muhokama qilingan. Bu tashabbusga hozircha faqat Tojikiston rasmiylari qarshi chiqqan.
“Rossiya va ushbu tadbir ishtirokchilarining aksariyati Afg‘oniston aloqa guruhi faoliyatini qayta tiklash tarafdori edi. Tojikistonlik hamkorlarimiz bunga hali ham maʼlum bir shubha bilan qarashadi, ammo umid qilamizki, yaqin kelajakda ular ham o‘z pozitsiyalarini yumshatadilar”, — degan Zamir Kabulov.
Bir yil avval “Tolibon” rahbariyati vakillariga Shanxay hamkorlik tashkiloti sammitlarida qatnashish huquqi berilgan edi. Afg‘onistondagi amaldagi hukumat ushbu voqea o‘zaro aloqalarni mustahkamlashini xabar qilgan.
“Afg‘oniston Islom Amirligi (“Tolibon” tomonidan qo‘llanilgan davlat nomi) mintaqaviy xavfsizlikni taʼminlash va hamkorlikni rivojlantirish maqsadida muvofiqlashtiruv jarayonini yaxshilash maqsadida bunday uchrashuvlarning o‘tkazilishini olqishlaydi. Shuningdek, Afg‘onistonning bunday yig‘ilishlarda qatnashishi uning qonuniy huquqidir”, — deyilgan “Tolibon” bayonotida.
“Tolibon” ga ko‘ra, SHHT yig‘ilishlarida afg‘on hukumati vakillarining ishtirok etmasligi xavfsizlik muammolariga qarshi kurashish, narkotik moddalar savdosiga qarshi harakat, afg‘on aholisiga gumanitar yordam ko‘rsatish va infratuzilma loyihalarini amalga oshirish bo‘yicha harakatlarni har tomonlama muvofiqlashtirishga to‘sqinlik qilmoqda.
2021-yilda Afg‘onistonda “Tolibon hokimiyat tepasiga kelguniga qadar bu davlat SHHT ishida kuzatuvchi sifatida to‘liq ishtirok etgan. Afg‘onistonning sobiq rahbarlari ushbu tashkilot sammitlarida muntazam qatnashib kelgan.
Oldinroq, Rossiya rasmiylari “Tolibon”ni terrorchi tashkilotlar ro‘yxatidan chiqarish haqidagi qaror nusxasi allaqachon Rossiya prezidenti stolida ekanini bildirishgan edi. Uning imzolanishi amalda “Tolibon”ni tan olish bilan barobar ekani aytilgan.
Joriy yilning 3-iyun kuni Qozog‘iston prezidenti Qosim-Jo‘mart To‘qayev uning hukumati Afg‘onistonning “Tolibon” nazoratidagi hukumati bilan iqtisodiy hamkorlikni rivojlantirish uchun tashkilotni allaqachon terrorchi tashkilotlar ro‘yxatidan chiqarganini eʼlon qilgan edi.
“Qozog‘iston zamonaviy Afg‘oniston bilan savdo-iqtisodiy hamkorlikni rivojlantirish muhimligi hamda bu rejim uzoq muddatli omil ekanligini anglagan holda “Tolibon” rejimini terrorchilar ro‘yxatidan chiqardi”, — degan edi To‘qayev.
Tojikiston hukumati esa amalda “Tolibon” rejimini tan olishdan bosh tortgan. Dushanbe Afg‘onistonning yangi hukumati inklyuziv hukumat tuzishni maʼqullamagunicha hech qanday aloqalar bo‘lmasligini bildirgan. Tojikiston rahbari Imomali Rahmon Afg‘oniston aholisining 46 foizi etnik tojik ekanligini hamda ularning vakillariga hukumatda munosib o‘rin berilishi shart ekanligini maʼlum qilgan.
- Maʼlumot o‘rnida, sobiq Afg‘oniston Islom Amirligi vakillari so‘nggi marta 2021-yil 14-iyul kuni Dushanbe shahrida “SHHT – Afg‘oniston” doirasidagi tashqi ishlar vazirlari uchrashuvida ishtirok etgan edi.
- O‘sha yilning avgust oyida esa “Tolibon” hokimiyatni egallagan.
Izoh (0)