Rossiya Adliya va Tashqi ishlar vazirliklari prezident Vladimir Putinga murojaatnoma yo‘llab, “Tolibon”ni taqiqlangan tashkilotlar ro‘yxatidan o‘chirishni so‘ragan. Bu haqda Rossiyaning Afg‘oniston bo‘yicha maxsus vakili Zamir Kabulov bergan maʼlumotga asoslanib, Hasht-e Subh Daily nashri xabar berdi.
Zamir Kabulov ushbu taklif Rossiyaning bir qator hukumat institutlari tomonidan qo‘llab-quvvatlanganini aytgan. Ushbu holat Rossiya va “Tolibon” aloqalarida muhim omil ekanligi taʼkidlangan.
“Ammo hali ham baʼzi to‘siqlarni yengib o‘tish kerak, shundan keyin Rossiya rahbariyati bu borada uzil-kesil qaror qiladi”, — deyilgan Rossiya vakilining bayonotida.
“Tolibon” Rossiya bilan yaqin munosabatlarga ega. Ammo Moskva hozircha bu guruh rejimini tan olgani yo‘q. Shu bilan birga “Tolibon” Rossiya hududida taqiqqa ega.
Moskva har doim Tolibon tomonidan inklyuziv hukumat o‘rnatishni talab qilib keladi. Mamlakatdagi barcha etnik guruhlar hamkorligidagi boshqaruv joriy etilishini rag‘batlantiradi.
Oldinroq Zamir Kabulov “Tolibon” Rossiyaning dushmani emasligini va mamlakatlarning o‘zaro aloqalari kengayib borayotganini aytgan edi.
“Tolibon”ni taqiqdan chiqarish haqidagi qaror matni Rossiya prezidenti stolida ekani maʼlum qilingan. Agar u imzolansa, Rossiya hukumati tomonidan Afg‘onistondagi hukmron guruhni tan olish borasidagi to‘siq yo‘qoladi.
Izoh (0)