“Tolibon” harakati Rossiya texnikasidan foydalangan holda Afg‘oniston havo mudofaa tizimini qurmoqchi. Bu haqda Forbes xabar berdi.
Afg‘oniston muvaqqat hukumati 2023-yil boshida mamlakat byudjetining eng katta ulushini mudofaa uchun ajratdi. “Tolibon” havo hujumidan mudofaa tizimini qurishni maqsad qilganini aytdi.
“Zenit raketalari — mamlakatning ehtiyoji. Shubhasiz, Afg‘oniston ularni qo‘lga kiritish uchun barcha imkoniyatlarni ishga solmoqda”, degan “Tolibon” qo‘mondoni qori Fasihiddin Fitrat.
29-avgust kuni Afg‘oniston Mudofaa vazirligining moddiy-texnik ta’minot bo‘limi boshlig‘i general Said Abdul Basir Saberi ancha ochiqchasiga gapirdi.
“Menimcha, bizga havo mudofaasi va havo hududini nazorat qilish uchun uskunalar kerak. Bizda yer usti uskunalari mavjud. Xalqaro-huquqiy sharoitlar yuzaga kelganda, bunday mahsulotlarni xalqaro darajada sizdan sotib olishimizni o‘ylayman”, deb ta’kidladi Saberi.
Uning bayonoti Rossiya bilan munosabatlarning iliqlashuvi fonida yangradi. Jumladan, Rossiya may oyida “Tolibon” rasmiylarini Sankt-Peterburg forumiga taklif etdi.
“Tolibon” havo hujumidan mudofaa tizimini qo‘lga kiritishi AQSHni xavotirga solishi mumkin, ya’ni AQSH tomonidan uchirilgan dronlar mazkur tizim tomonidan tutib olinadi. Mart oyida “Tolibon” Amerika dronlari mamlakat havo hududini “buzayotgani”ni ta’kidlagandi.
Yevropa siyosatini tahlil qilish markazining “Demokratik barqarorlik” dasturi katta ilmiy xodimi Pavel Luzin Rossiyaning yaqin kelajakda toliblarga zamonaviy qurol-yarog‘ sotishiga shubha bildirmoqda va Saberining bayonotini Kreml uchun “shirin so‘z” deb baholamoqda.
“‘Tolibon’ bir nechta havo mudofaasi tizimlarini olishni istaydi, biroq hozircha ularni sotib olishga tayyor emas. Rossiyaning qurol-yarog‘ yetkazib berish bo‘yicha ko‘p yillik tajribasi bo‘lishiga qaramay, bu yerda xohish-istak haqiqat sifatida taqdim etilmoqda.
Bundan tashqari, havo hujumidan mudofaa bo‘yicha har qanday bitim Rossiya tizimni shunchaki javondan olib berishini anglatmaydi.“Buk”, “Tor” yoki “Pansir” kabi havo hujumidan mudofaa tizimlarini Afg‘onistonga yetkazib berishning yagona imkoniyati — ularni ekipajlar bilan birga jo‘natish. ‘Tolibon’ bu tizimlarni boshqarishni yaxshi o‘zlashtirmagan”, deydi Luzin.
Izoh (0)