Ijtimoiy tarmoqlarda O‘zbekiston va Afg‘oniston chegarasidagi hudud osmonini qora tutun qoplagani aks etgan videolar tarqaldi. Surxondaryo viloyati hokimligi holatga izoh berdi.
Unga ko‘ra, O‘zbekiston va Afg‘oniston davlatlari chegarasidagi neytral hududda, Amudaryo ichkarisida joylashgan kichik orolchalarda qamishzorlarni rejali tartibda yoqish ishlari amalga oshirilmoqda.
Mazkur tadbir zararli hasharotlar ko‘payishi va yuqumli kasalliklar tarqalishining oldini olish maqsadida mutasaddi idoralarning ruxsati va mas’ul organlarning o‘zaro kelishuvi asosida olib borilmoqda. Yong‘in harakatlari va ularning ko‘lami to‘liq nazorat qilinmoqda.
Ushbu tadbir belgilangan rejaga muvofiq va xavfsizlik choralariga rioya etgan holda amalga oshirilayotgani ma’lum qilindi.
Fuqarolardan vaziyat bo‘yicha ortiqcha vahimaga berilmaslik, ijtimoiy tarmoq foydalanuvchilaridan esa aholi o‘rtasida vahima keltirib chiqaruvchi asoslanmagan axborot tarqatmaslik so‘raldi.
O‘zbekiston—Afg‘oniston savdo aylanmasini oshirish rejasi
Bosh vazir Abdulla Aripov 2024-yil avgustida Kobulga tashrifi davomida o‘tkazilgan muzokaralarda Afg‘oniston bilan savdo aloqalarini rivojlantirish, energetika sohasidagi samarali hamkorlik aloqalarini yangi bosqichga olib chiqish, mis, temir, neft-gaz konlarini birgalikda o‘zlashtirish loyihalarini amalga oshirish, shuningdek, transport-logistika, qishloq va suv xo‘jaligi, ta’lim, hududlararo munosabatlarni yanada chuqurlashtirish yuzasidan fikr almashilgandi. O‘zaro savdo aylanmasini 2024-yilda 1 milliard dollarga, yaqin istiqbolda esa 3 milliard dollarga yetkazish bo‘yicha barcha imkoniyatlar mavjudligi ta’kidlangandi.
Afg‘oniston savdo vaziri Nuruddin Aziziy ham O‘zbekiston bilan savdo hajmini yiliga 3 milliard dollarga yetkazish bo‘yicha ishlar olib borilayotgani aytgandi.
2025-yil 22-fevral kuni Toshkentda Abdulla Aripov “Tolibon” bosh vazirining iqtisodiy masalalar bo‘yicha o‘rinbosari Abdul G‘ani Barodar bilan ikki tomonlama muzokaralar o‘tkazdi. Uchrashuvda o‘zaro manfaatli aloqalarni yanada kengaytirish, savdo-iqtisodiy, energetika, transport va boshqa sohalarda hamkorlikni rivojlantirish masalalari yuzasidan fikr almashildi.
Shu kuni Abdul G‘ani Barodar O‘zbekiston bosh vaziri o‘rinbosari Jamshid Xo‘jayev bilan ham uchrashdi. Uchrashuvda savdo-tranzit aloqalarini kengaytirish, o‘zbekistonlik investorlarning Afg‘onistonga investitsiya kiritishi masalalari muhokama qilindi. O‘zbekiston tomoni ikki tomonlama savdo aloqalarini faollashtirish maqsadida ikki davlat chegarasida qo‘shma savdo zonasini tashkil etishga tayyorligini aytgan.
Izoh (0)