Afg‘onistonning Parvon viloyati Salang tunnelida 17-dekabr kuni neft tankerining ag‘darilib, yonishi oqibatida 31 kishi halok bo‘lgandi. O‘zbekiston Tashqi ishlar vazirligi holat yuzasidan rasmiy bayonot e’lon qildi.
Salang tunnelida yonilg‘i tashuvchi avtomashinaning portlashi oqibatida ko‘plab qurbonlar bo‘lgani haqidagi xabarni chuqur qayg‘u bilan qabul qildik. Halok bo‘lganlarning oila a’zolari va yaqinlariga hamdardlik bildiramiz va jarohatlanganlarning tezroq sog‘ayib ketishini tilaymiz, — deyiladi unda.
Hodisa qanday sodir bo‘ldi?
Dastlab hodisa qurbonlari 19 kishini tashkil qilgan, biroq statistik ma’lumotlar o‘zgargan. Hozirda 31 kishi halok bo‘lgani va 37 kishi jarohatlangani aytilmoqda. Salang tumanidagi ishonchli manba yong‘indan keyin tunnel ichida yana bir suyuq gaz tankeri portlaganini xabar bergan.
Tunnel ichidagi qorong‘ilik yong‘inni nazorat qilish va odamlarni qutqarishni qiyinlashtirgan. Rasmiylar qurbonlar soni yana oshishi mumkinligini prognoz qilmoqda. Yong‘in guvohlarga ko‘ra, bir erkakning oila a’zolari ko‘z o‘ngida yonib ketgan. Afg‘oniston shimolidan ko‘p odamlar oila a’zolarini qidirish uchun voqea joyiga yo‘l olmoqda.
Ayni paytda “Tolibon” Jamoat ishlari vazirligi yong‘in o‘chirilgani, brigadalar hududni tozalash ishlari olib borilayotganini ma’lum qildi. Mahalliy manbalar jarohatlanganlar va yo‘lovchilariga yordam ko‘rsatish jarayoni sust kechayotganidan shikoyat qilmoqda.
Hozirda Salang tunneli yopilgan va “Tolibon” bu yo‘nalishda harakatlanishni taqiqlagan. Yangilangan statistik ma’lumotlarga ko‘ra, bu hodisada 100 ga yaqin odam halok bo‘lgan.
4-dekabr kuni Afg‘oniston va Eron o‘rtasidagi umumiy chegarada yong‘in chiqqandi. Oqibatda 20 dan ortiq traktor va bir nechta avtomobili yonib ketgan. Transport egalari esa katta moliyaviy zarar ko‘rgan. Hodisa oqibatida jabrlanganlar ham bor, yong‘inga traktorning yonishi sabab bo‘lgandi.
Izoh (0)