Pokiston va Afg‘oniston xavfsizlik kuchlari yaqinda yopilgan ikki mamlakat o‘rtasidagi asosiy chegara o‘tish punktida o‘t ochishi oqibatida kamida bir kishi halok bo‘ldi. Bu haqda Al Jazeera xabar berdi.
Afg‘oniston Ichki ishlar vazirligi Torxam o‘tish joyidagi tungi to‘qnashuvlarda bir a’zosi halok bo‘lgani va ikkitasi yaralanganini tasdiqladi. Torxam muhim tranzit punkt hisoblanadi. Pokiston uni o‘tgan oyda qo‘shnisining yangi chegara posti qurilishi bilan bog‘liq kelishmovchiliklar tufayli yopib qo‘ygan edi.
Pokiston xavfsizlik xizmatining ikki xodimi, ismini oshkor etmaslik sharti bilan to‘qnashuvlarda ularning xavfsizlik kuchlari a’zolari ham jarohatlangani haqida xabar berdi. Hodisaga nima sabab bo‘lganini tomonlar ochiqlamagan.
To‘qnashuv oqibatida qahraton qish sharoitida chegaraning har ikki tomonida zaruriy tovarlar ortilgan 5 mingga yaqin yuk mashinasi to‘xtab qolgan. Avval ham ikki davlat Torxam va janubi-g‘arbiy Chamandagi chegara o‘tish punktlarini otishmalar va to‘qnashuvlardan so‘ng yopgan edi.
Pokiston Afg‘oniston hududidan hujumlarga duch kelayotganini ta’kidlamoqda, ammo “Tolibon” hukumati buni inkor etmoqda. 2024-yil dekabr oyida Pokiston harbiy samolyotlari Afg‘oniston hududiga zarba berib, o‘nlab odamlarning halok bo‘lishiga sabab bo‘lgan.
Kobuldagi Ichki ishlar vazirligi matbuot kotibi Abdul Matin Qani 3-mart kuni Pokistonni tungi zo‘ravonlikni boshlashda aybladi. Shundan so‘ng Afg‘oniston xavfsizlik kuchlari muloqotga urinishlari natija bermagach, “mudofaa holatiga” o‘tganini va javob qaytarganini bildirdi.
Nomi oshkor etilmaslik sharti bilan gapirgan Pokiston rasmiysi Associated Press nashriga xabar berishicha, “Tolibon” hech qanday sababsiz Pokistonning chegara postiga avtomatik qurollardan o‘q uzgan. Pokiston harbiylari esa bunga javoban o‘t ochgani aytilmoqda.
Pokistonning o‘tish joyida joylashgan Haybar tumani savdo-sanoat palatasi prezidenti Yusuf Afridiga ko‘ra, Torxamning yopilishi kamida 15 million dollar zarar keltirgan.
Afg‘onistondagi Nangarhor savdo va investitsiya palatasi bosh ijrochi direktori Shakirullah Safi esa afg‘on savdogarlari kuniga 500 ming dollar yo‘qotayotganini aytmoqda.
Pokiston Tashqi ishlar vazirligi ma’lumotlariga ko‘ra, 2024-yilda ikki mamlakat o‘rtasidagi savdo aylanmasi 1,6 milliard dollardan oshgan.
Izoh (0)