O‘zbekiston Afg‘onistonga elektr uzatish liniyasini qurish loyihasi qiymatini 30 mln dollarga pasaytirishga rozi bo‘ldi. Bu haqda Amu TV xabar bermoqda.
Afg‘oniston bosh vaziri o‘rinbosari vazifasini bajaruvchi Mullo Abdul G‘ani Barodarning aytishicha, O‘zbekistondan Afg‘onistondagi Dashti Alvonga 500 kVt elektr energiyasini o‘tkazish bo‘yicha loyiha qiymatining 252 mln dollardan 222 mln dollarga tushirilgani muhim yutuqlardan biri bo‘lgan.
Taʼkidlanishicha, O‘zbekiston yoz oylarida Afg‘onistonga elektr energiyasi eksportini oshirish va shu bilan birga tariflarni kamaytirishga kelishib olgan.
Erishilgan kelishuvlar doirasida O‘zbekiston Afg‘oniston qishloq xo‘jaligi mahsulotlarini yetkazib berishga qo‘yilgan cheklovlarni bekor qiladi va ikki davlatning yirik shaharlarida to‘rtta savdo markazi ochadi.
Shuningdek, O‘zbekiston va Afg‘oniston Hayraton-Hirot temiryo‘li qurilishi bo‘yicha kelishuvga erishilgani aytildi. Barodarning so‘zlariga ko‘ra, O‘zbekiston tomoni texnik-iqtisodiy asoslarni tayyorlash uchun o‘z guruhini jo‘natadi.
Taʼkidlanishicha, loyihaning dastlabki texnik baholash xarajatlari O‘zbekiston tomonidan qoplanadi. Temir yo‘l loyihasi O‘zbekiston bilan chegaradosh muhim port shahri bo‘lgan Hayratondan Mozori Sharif orqali Afg‘oniston g‘arbidagi Hirotgacha bo‘lgan mavjud yo‘nalishni kengaytirishni nazarda tutadi.
2010-yilda loyihaning birinchi bosqichida Osiyo taraqqiyot banki moliyaviy ko‘magida Hayraton va Mozori Sharifni bog‘lovchi 75 km lik temiryo‘l liniyasi qurildi. Ushbu yo‘nalish Afg‘oniston va Markaziy Osiyo davlatlari o‘rtasidagi savdo aloqalarini mustahkamlashning asosiy elementiga aylandi.
Rejalashtirilgan kengaytirish Mozori Sharifni bir qancha viloyatlar orqali Hirot bilan bog‘lashni ko‘zda tutadi. Loyiha Markaziy Osiyoni Yaqin Sharq bilan bog‘lovchi strategik ahamiyatga ega transport yo‘lagini yaratishi, bu esa o‘z navbatida mintaqaviy savdo-iqtisodiy integratsiyani rag‘batlantirishi kutilmoqda.
Avvalroq O‘zbekiston bosh vaziri Abdulla Aripov Afg‘oniston bosh vaziri o‘rinbosari vazifasini bajaruvchi Mullo Abdul G‘ani Barodar bilan ikki tomonlama muzokaralar o‘tkazgani haqida xabar berilgandi.
Uchrashuvda o‘zaro manfaatli aloqalarni yanada kengaytirish, savdo-iqtisodiy, energetika, transport va boshqa sohalarda hamkorlikni izchil rivojlantirish masalalari yuzasidan atroflicha fikr almashilgan.
“Tolibon” bosh vazirining iqtisodiy masalalar bo‘yicha o‘rinbosari Abdul G‘ani Barodar undan avval bosh vazir o‘rinbosari Jamshid Xo‘jayev bilan uchrashgandi. Uchrashuvda savdo-tranzit aloqalarini kengaytirish, o‘zbekistonlik investorlarning Afg‘onistonga investitsiya kiritishi masalalari muhokama qilindi. O‘zbekiston tomoni ikki tomonlama savdo aloqalarini faollashtirish maqsadida ikki davlat chegarasida qo‘shma savdo zonasini tashkil etishga tayyorligini aytgan. Ushbu savdo hududida qarag‘ay yong‘og‘i va paxtani qayta ishlash zavodlari, qadoqlash va logistika markazlari hamda turli oziq-ovqat mahsulotlari ishlab chiqarish sexlari joylashtiriladi.
Uchrashuvda o‘zbekistonlik sarmoyadorlar Afg‘onistondagi neft va gazni qidirish hamda qazib olish ishlarida hamkorlik qilishga, sanoat sohasiga, xususan, Samangan viloyatida sement zavodi qurishga sarmoya kiritishga tayyor ekani ta’kidlangan. Toti Maydon gaz konini o‘rganish bo‘yicha sezilarli natijalarga erishilgani va yaqin kelajakda qazib olish ishlari boshlanishi ma’lum qilindi.
O‘zbekiston Afg‘oniston bilan savdo aylanmasini 3 mlrd dollarga oshirmoqchi
Bosh vazir Abdulla Aripov 2024-yil 17-avgust kuni Kobulga tashrif buyurgandi. Muzokaralarda Afg‘oniston bilan savdo aloqalarini rivojlantirish, energetika sohasidagi samarali hamkorlik aloqalarini yangi bosqichga olib chiqish, mis, temir, neft-gaz konlarini birgalikda o‘zlashtirish loyihalarini amalga oshirish, shuningdek, transport-logistika, qishloq va suv xo‘jaligi, ta’lim, hududlararo munosabatlarni yanada chuqurlashtirish yuzasidan fikr almashilgan.
O‘zaro savdo aylanmasini 2024-yilda 1 milliard dollarga, yaqin istiqbolda esa 3 milliard dollarga yetkazish bo‘yicha barcha imkoniyatlar mavjudligi ta’kidlangandi.
Izoh (0)