Afg‘oniston aholisining yarmidan ko‘pi — qariyb 23 million kishi insonparvarlik yordamiga muhtoj. Bu haqda BMT bosh kotibining maxsus vakili va tashkilotning Afg‘onistonga ko‘mak missiyasi rahbari Roza Otunbayeva Xavfsizlik kengashi yig‘ilishida ma’lum qilgan.
Ta’kidlanishicha, Afg‘oniston yillar davomida olib borilgan urushlar, chuqur ildiz otgan qashshoqlik, iqlim o‘zgarishlari, aholi sonining o‘sishi, ayniqsa, ayollar va qizlar uchun kuchayib borayotgan xavf-xatarlar tufayli jiddiy insonparvarlik inqirozini boshdan kechirmoqda.
“Insonparvarlik yordamini moliyalashtirishning kamayishi afg‘on xalqiga jiddiy ta’sir ko‘rsatmoqda va bu ta’sir davom etadi. So‘nggi bir oyda 200 dan ortiq tibbiyot muassasasi yopildi, bu 1,8 million atrofidagi odamga ta’sir qildi. Bolalar to‘yib ovqatlanmasligini davolash bo‘yicha hayotiy muhim xizmatlarni ko‘rsatish cheklangan, hamkor tashkilotlar o‘z faoliyati va muvofiqlashtirish imkoniyatlarini sezilarli darajada kamaytirgan”, deydi Roza Otunbayeva.
Yig‘ilishda “Tolibon” harakati xalqaro majburiyatlarning ba’zilarini mamlakat suverenitetiga tajovuz qilish yoki uning an’analariga mos kelmaslik bahonasida rad etayotgani afsuslanarli ekanligi bildirilgan.
Otunbayevaning so‘zlariga ko‘ra, ko‘plab afg‘onlar Missiyaga murojaat qilib, amaldagi hokimiyatning fuqarolar shaxsiy hayotiga aralashuvidan norozilik bildirgan.
Avvalroq “Tolibon” ayollarning jamoaviy namoz o‘qish uchun masjidga kirishini taqiqlagani haqida xabar berilgandi.
Izoh (0)