Afg‘oniston Oliy ta’lim vazirligi 500 nafar afg‘on talabaning Rossiyaga o‘qishga borishini taqiqladi, deya Afg‘onistonning “Tolibon” harakatiga muxolif bo‘lgan “Hasht-e Sobh” gazetasi xabar berdi.
So‘nggi uch yil mobaynida toliblar nafaqat afg‘on qizlari va ayollarini ijtimoiy, ta’lim va ilmiy hayotning barcha jabhalaridan mahrum etdi, balki erkaklar uchun ham ko‘plab cheklovlar joriy qildi. Guruh talabalar “Rossiyaga musulmon bo‘lib ketib, uyga kommunist bo‘lib qaytadi” degan bahonani ro‘kach qilib, ularning ketishiga to‘sqinlik qilmoqda, deb yozadi nashr.
Nashrning xabar berishicha, Afg‘oniston Oliy ta’lim vazirligi yaqinda 500 nafar talabaning Rossiyaga borishini yana bir bor taqiqlab, “ularning e’tiqodlari u yerda buzilishi mumkinligini” aytgan. Rossiya stipendiyalariga da’vogar bo‘lgan talabalar 2023-yilda ro‘yxatdan o‘tganliklarini va 2024-yilda imtihonlarni muvaffaqiyatli topshirganlaridan so‘ng barcha ma’muriy tartib-qoidalarni bajarganliklarini ta’kidlashmoqda.
Talabalarning aytishicha, keng tarqalgan qashshoqlik va ishsizlikka qaramay, ularning har biri safar hujjatlari va tibbiy ko‘riklar uchun 100 dollardan 150 dollargacha mablag‘ sarflagan.
Bir necha oylik kutish va ko‘plab uchrashuvlardan so‘ng, Rossiya elchisi va Kobuldagi Rossiya fan va madaniyat uyi rahbari talabalarga muammolarni Rossiya emas, balki Afg‘oniston Oliy ta’lim vazirligi keltirib chiqarayotganini ma’lum qildim, deb yozadi “Hasht-e Sobh”.
Stipendiya olishga da’vogar talabalar, “Tolibon”ning bu harakatlari yoshlarning yorqin kelajak va oliy ma’lumot olish kabi asosiy huquqlarini rad etish ekanligini ta’kidlamoqdalar.
Talabalar Rossiya hukumatini ularning muammosini hal qilish uchun “Tolibon" harakati bilan muloqot o‘rnatishga chaqirmoqda. Ularning aytishicha, o‘tmishda ham toliblar afg‘on talabalarining Rossiyada ta’lim olishiga to‘sqinlik qilgan, ammo Rossiya talabalarga Eron orqali o‘quv vizalarini olish va tegishli universitetlarga o‘qishga kirishda yordam bergan.
Nashr bilan suhbatda bo‘lgan yana bir afg‘on talabasiga ko‘ra, Afg‘oniston Oliy ta’lim vazirligi amaldorlari talabalarning e’tiqodlari Rossiyada buzilishini, aynan shuning uchun u yerda o‘qishga ruxsat berilmaganini aytgan.
Izoh (1)
Qarshi tarafda shunday real farazlar borki, ular borib ham o'qib, ham ishlab, ham "qatnashib" o'zlari istamagan hollarda, hozirgi boshqaruvning qaltis imidjiga ortiqcha "bo'yoq" chaplab qo'yishlari mumkin, menimcha. "U yerdagilarga" ham oson tuti bo'lmaydi...