Rossiya prezidentining Afg‘oniston bo‘yicha maxsus vakili Zamir Kabulov “Tolibon” terrorchi emas, balki pushtun diniy urf-odatlarining targ‘ibotchilari ekanini maʼlum qildi. Bu haqda Rossiya vakilining so‘zlaridan iqtibos keltirib, Aamaj News nashri xabar berdi.
Kabulovga ko‘ra, “Tolibon” joriy qilgan ayrim cheklovlar aslo terrorizm va diniy ekstremizm taqiqlari sifatida qabul qilinmasligi kerak. “Tolibon” asosini pushtun rahbarlari tashkil etadi va ular o‘z sinfining diniy urf-odatlarini joriy etish uchun harakat qilmoqda.
Rossiya rasmiysi xorijiy hukumatlarning “Tolibon” ichki ishlariga aralashuvini ham qoralagan. Harakat yuqori salohiyatga egaligi va mamlakatni idora qila olishini taʼkidlagan.
“Biz Tolibonga o‘z davlatini qanday boshqarishi kerakligi haqida maʼruza o‘qimasligimiz kerak”, — degan Zamir Kabulov Tribune nashriga bergan intervyusida.
Maxsus vakilga ko‘ra, “Tolibon” bugun Afg‘onistondagi reallikka aylanib, bo‘lgan va undan yuz burish mumkin emas. Rossiya prezidenti ham Kobul bilan aloqalarini shu tamoyil asosda qayta tashkil etishni buyurgan.
“Tolibon”ning hokimiyatga qaytishini Rossiya rasmiylari sakkiz yil oldin taxmin qilganini daʼvo qilgan Kabulov Moskva Afg‘onistonda koalitsion hukumat tuzilishini qo‘llab-quvvatlayotganini bildirgan. Biroq Ashraf G‘ani hokimiyati ag‘darilishi ortidan bu rejalar muvaffaqiyatsizlikka qarab ketmoqda.
- Maʼlumot o‘rnida, “Tolibon” hozirchalik Rossiyaning terrorchi guruhlar ro‘yxatiga kiritilgan.
- Kreml rasmiylari Afg‘onistondagi ustun hokimiyatni bu ro‘yxatdan chiqarish rejalashtirilayotganini bildirgan.
Izoh (0)