Eron prezidenti Ibrohim Raisiy vafoti munosabati bilan Tehronga tashrif buyurgan “Tolibon” delegatsiyasi HAMAS siyosiy idorasi rahbari Ismoil Haniya bilan uchrashdi. Bu haqda Hasht-e Subh Daily xabar berdi.
Uchrashuvda tomonlar nimalarni muhokama qilgani haqida ma’lumot berilmagan. Haniya bilan uchrashuv aks etgan suratlar Afg‘oniston tashqi ishlar vaziriligi rasmiysi Hofiz Ahmad tomonidan e’lon qilingan.
“Tehronda iqtisodiyot vaziri o‘rinbosari Abdul G‘ani Barodar va tashqi ishlar vaziri Amir Xon Muttaqiy HAMAS siyosiy idorasi rahbari Ismoil Haniya bilan uchrashgan”, — deyiladi xabarda.
Eron prezidenti Ibrohim Raisiy bilan vidolashuv marosimida ishtirok etish uchun Eronga 13 ta davlatdan 15 nafar davlat rahbari va yuqori martabali amaldorlar kelgan. Qatar amiri, Turkmaniston milliy rahbari, Tunis va Tojikiston prezidentlari, Iroq, Pokiston, Armaniston, Qatar, Ozarbayjon bosh vazirlari, Iroq, Rossiya, Jazoir, O‘zbekiston, Qozog‘iston va Livan parlamentlari raislari tashrif buyurgan.
“Tolibon” Eron prezidenti va uning hamrohlari vafot etgani munosabati bilan birinchilardan bo‘lib, hamdardlik bildirgan. Afg‘oniston do‘st va birodar Eron xalqini qo‘llab-quvvatlashi ta’kidlangan.
Eslatib o‘tamiz, 19-may kuni Eron prezidenti Ibrohim Raisiy aviahalokat natijasida vafot etdi. Mamlakat shimoli-g‘arbida Eron prezidenti va tashqi ishlar vaziri bo‘lgan vertolyot halokatga uchragandi.
Kuchli tuman va tog‘li hudud tufayli halokatga uchragan vertolyotni qidirish 10 soatdan ortiq davom etgan. Mutaxassislar fikricha, halokat texnik nosozlik yoki inson omili tufayli yuz bergan bo‘lishi mumkin. Raisiy vafoti munosabati bilan Eronda besh kunlik motam e’lon qilingan. Eron prezidentining dafn marosimi 23-may kuni Mashhad shahrida bo‘lib o‘tdi. Muddatidan oldin prezidentlik saylovlari 28-iyunga belgilangan.
Izoh (0)