“Толибон” жамоат ишлари вазири Муҳаммад Исо Соний Афғонистондаги Россия элчиси Дмитрий Жирнов билан музокаралар ўтказди. Учрашувда совет муҳандислари томонидан қурилган, стратегик аҳамиятга эга Саланг шоссесини қайта қуриш ва у ерда янги автомобиль йўли учун туннел барпо этиш масалалари муҳокама қилинди. Бу ҳақда Интерфакс хабар берди.
Томонлар Россиядан инфратузилма лойиҳалари учун зарур бўлган асбоб-ускуналар, қурилиш техникаси, материаллар, жумладан битум ва темир йўл таркибий қисмлари етказиб бериш масаласини ҳам кўриб чиқди.
Россия элчиси ўз мамлакатининг ушбу соҳаларда ҳамкорликка тайёр эканини билдирди, дейилади Афғонистон жамоат ишлари вазирлиги баёнотида.
“Толибон” делегацияси ташаббусларни янада батафсил муҳокама қилиш учун Россияга ташриф буюришни режалаштирмоқда.
Саланг туннели — Саланг довони орқали мамлакатнинг жанубий ва шимолий ҳудудларини боғлайдиган Афғонистоннинг энг муҳим транспорт артериясидир. У 1958—1964 йилларда совет муҳандислари томонидан қурилган ва ҳозирга қадар Афғонистон йўл тизимининг асосий бўғини бўлиб қолмоқда.
Бу “Толибон” вакиллари Москвага инфратузилма ташаббусларида иштирок этишни таклиф қилаётган биринчи ҳолат эмас. 2023 йилда афғон томони Россия ва Қозоғистонни Трансафғон темир йўлини қуриш лойиҳасида иштирок этишга чақирган. Ўшанда “Толибон” томонидан ташкил этилган Савдо ва саноат вазирлиги таъкидлашича, лойиҳа нафақат Афғонистон, балки бошқа мамлакатлар учун ҳам манфаатли эди.
“Толибон” ҳаракати 2021 йилда АҚШ қўшинлари Афғонистонни тарк этганидан сўнг мамлакатда ҳокимиятни қўлга киритди. Шунга қарамай улар тузган ҳукумат ҳеч бир давлат, жумладан Россия томонидан тан олинмаган. Бунга инсон ҳуқуқларининг мунтазам равишда бузилиши, инклюзив сиёсий тизимни яратишдан бош тортиш ва бошқа масалалар сабаб бўлмоқда.
Изоҳ (0)