“Tolibon” harakatiga yon berish Markaziy Osiyoda terrorizmga olib keladi — Afg‘oniston ozodlik fronti

Rossiya “Tolibon” harakatini “terrorchi tashkilotlar” ro‘yxatidan chiqarish ustida ishlamoqda. Afg‘oniston ozodlik fronti “Tolibon”ga yon berish orqali Rossiya “terrorizm”ni Markaziy Osiyoga va undan tashqariga yoyishini ta’kidladi. Bu haqda Hasht-e Subh Daily xabar berdi.

Ozodlik frontining ta’kidlashicha, “Tolibon” harakatini “terrorchi tashkilotlar” ro‘yxatidan chiqarish “Rossiyadek buyuk davlatning qadr-qimmatiga zid bo‘ladi”.

“Tolibon” bir qator terrorchi guruhlar, jumladan, “Tahriki Tolibon” (TTP), Tojikistonning “Ansorulloh”, “Al-Qoida”, Sharqiy Turkiston Islomiy harakati va boshqa guruhlar bilan aloqada, — deydi Afg‘oniston ozodlik fronti.

Shuningdek, bayonotda “Tolibon” Afg‘onistonda siyosiy hokimiyatni kuch bilan qo‘lga kiritgani va u mamlakatni qaytarib olganidan keyin ham fuqarolar, ayniqsa, ayollar huquqlarini poymol qilishda davom etgani ta’kidlanadi.

Eslatib o‘tamiz, 28-may kuni Rossiya tashqi ishlar vaziri Sergey Lavrov “Tolibon” nomini ushbu mamlakatdagi “terrorchi” tashkilotlar ro‘yxatidan chiqarib tashlash harakatini bildirdi. Rossiya prezidenti Vladimir Putin ham “Tolibon” bilan aloqalar o‘rnatish zarurligini aytgandi.