Fransiya Mudofaa vazirligi brigada generallari Andre Kustu va Pol Pellizarrini ommaviy bayonotlarda betaraflik va vazminlikni saqlash majburiyatiga rioya qilmagani uchun harbiy xizmatdan chetlatdi. Bu haqda Frans Press agentligi xabar bermoqda.
“Ikki sobiq general “o‘zini tuta bilish majburiyatiga rioya qilmagani” sababli lavozimidan bo‘shatildi”, deyiladi agentlik xabarida.
Ma’lum qilinishicha, Kustu 2021-yil 21-aprelda Valeurs Actuelles nashrida e’lon qilingan murojaatga imzo qo‘ygan yigirmata generaldan biri bo‘lgan. Bu murojaat Sharl de Goll siyosatiga qarshi “generallar fitna”sining yilligida chop etilgan edi.
Ushbu hujjatda harbiylar mamlakatning “parchalanishi”, “muayyan irqchilikka qarshilik” tufayli avj olgan “jamoalar o‘rtasidagi adovat”, shuningdek, “islomofobiyalik va shahar atrofidagi to‘dalar”ni qattiq qoralagan edi. Shuningdek, generallar “millatni asrash”ga sodiq siyosatchilarni qo‘llab-quvvatlashga tayyor ekanini, “tarqoqlik” davom etsa, “xizmatdoshlarning aralashuvi” talab etilishini ta’kidlagan.
Pellizarri esa 2024-yil aprelida Fransiyaning o‘sha paytdagi bosh vaziri Gabriel Attal, mudofaa vaziri Sebastyan Lekornyu va tashqi ishlar vaziri Stefan Sejurne ustidan sudga shikoyat qilgan. General hukumatni Fransiya armiyasi zaxirasidagi harbiy texnikani Ukrainaga topshirgani uchun tanqid qilgan. Sud bu shikoyatni ko‘rib chiqish prokuratura vakolatiga kirishini asos qilib, uni qabul qilmagan.
Pellizarrining aytishicha, uning ishdan bo‘shatilishi “shikoyat bilan bog‘liq noqonuniy jazo chorasi” hisoblanadi.
Izoh (0)